ئیرۆ رۆژا شەمی 3/5/2025 چاڤکانیەکی ل رۆژئاڤایێ کوردستانێ ئاشکەرا کر، چەکدارێن پەکەکێ ل باکورێ باژارێ حەسەکێ جوانەکی دن رەڤاندن
ھەمان چاڤکانیێ ئاشکەرا کر، رێخستنا چەتەیان یا ب ناڤێ “جوانێن شۆرەشگەر” کو گرووپەکی سەر ب پەکەکێ یە ل رۆژئاڤایێ کوردستانێ، جوانەکی دن یێ ب ناڤێ ئەحمەد وەلات محەمەد، کو 14 سالیە، ل باژارۆکێ دربەسیەیا ل باکورێ باژارێ حەسەکێ ب ئارمانجا چەکدارکرنا وی د ناڤا رێزێن پەکەکێ دە رەڤاند.
ھەرچەند د دانووستاندنێن ھێزێن سووریا دەمۆکراتیک (ھەسەدێ) و حکوومەتا دەمکی یا سووریێ دە بریار ھاتیە دایین کو ھەسەدە بکەڤە ناڤا ئارتێشا سووریێ، لێ چەکدارێن پەکەکێ ل رۆژئاڤایێ کوردستانێ، د مەھا بۆری دە ب دەھان زارۆکێن دن ب ئارمانجا چەکدارکرنا وان د ناڤا رەفێن پەکەکێ دە رەڤاندنە. ل ھەمبەر ڤێ یەکێ گەلەک بەرتەک و نەرازیبوون ھەنە، ب تایبەت ژی کەسووکارێن وان زارۆکان گەلک بەرتەکێن توند دیار دکن و داخواز دکن زارۆکێن وان بێن ڤەگەراندن.
هەر وەها تێ زانین فەرماندارێ ھێزێن سووریا دەمۆکراتیک مەزلووم کۆبانێ د سالا 2019 دە لگەل ڤێرجینیا گامبا نوونەرا نەتەوێن یەکگرتی بۆ کارووبارێن زارۆکان، ل سەر پەیمانەکێ ئیمزە کربوو، کو ئێدی زارۆکان تەڤلی ھێزێن خوە نەکە و زارۆکێن د ناڤ دە سەربەست بەردە، لێ تا نھا چ پابەندی ب وێ پەیمانێ نەھاتیە کرن، ھەر دەم چەکدارێن ب ناڤ و رەنگێن جودا د ناڤا هەسەدێ دە زارۆکان درەڤینن و تەڤلی لەشکەریا نەچاری دکن.
