سەرۆک بارزانی: ھەولێن سڕی سورەیا ئۆندەر ژ بۆ پرۆسەیا ئاشتیێ جھێ پێزانینەکا مەزنە

 سەرۆک مەسعوود بارزانی ژ بۆ کۆچا داوی یا سیاسەتمەدارێ ترک سڕی سورەیا ئۆندەر، سەرساخی ل مالباتا وی، سەرکرداتی، ئەندام و ئالیگرێن دەم پارتیێ کر و دیار کر کو ئەو خوە وەک ھەڤپارێ خەما وان دزانە.

سەرۆک بارزانی ئیرۆ 3یێ گولانا 2025، دەربارێ کۆچا داوی یا سڕی سورەیا ئۆندەر، کو ئەندامێ شاندا ئیمرالیێ بوو، پەیامەکا سەرساخیێ بەلاڤ کر.

د پەیاما سەرۆک بارزانی دە ھاتیە: “ب خەمگینیەکا مەزن نووچەیا کۆچا داوی یا کەسایەتی و سیاسەتمەدارێ ترکیەیێ، ھەڤسەرۆکێ بەرێ یێ دەم پارتیێ و وەکیلێ سەرۆکێ پارلامەنتۆیا ترکیەیێ (سڕی سورەییا ئۆندەر) گھیشتە من.”

سەرۆک بارزانی ھەروھا دبێژە: “خوەدێژێرازی سڕی سوورەیا ئۆندەر، کو ئەندامێ شاندا ئیمرالیێ ژی بوو، بەشەکا مەزن یا ژیانا خوە ژ بۆ خەباتا سیاسی و ئاشتییانە تەرخان کر و ھەولێن وی یێن د ئاراستەیا چارەسەریا ئاشتی ل ترکیەیێ دە جھێ پێزانینەکا مەزنە.”

د بەشەکا دن یا پەیامێ دە ھاتیە: “ئەز پرسە و سەرساخیێن خوە پێشکێشی مالبات، کەسووکار، دۆست، ھەڤال و ھەمفکرێن خوەدێژێرازی سڕی سورەیا ئۆندەر و ھەروھا سەرکرداتی، ئەندام و ئالیگرێن دەم پارتیێ دکم و خوە وەک ھەڤپارێ خەما وان دزانم.”

سەرۆک بارزانی د داویا پەیاما خوە دە گۆت: “ژ خوەدایێ مەزن ھێڤیدارم کو گیانێ خوەدێژێرازی ب بهەشتا فرەھ شاد بکە و سەبر و ئارامیێ بدە ھەموو ئالیان.”

سڕی سورەیا ئۆندەر، وەکیلێ سەرۆکێ پارلامەنتۆیا ترکیەیێ و پارلامەنتەرێ پارتیا وەکھەڤی و دەمۆکراسیێیا گەلان (دەم پارتی)، کو د ھەمان دەمێ دە ئەندامێ شاندا ئیمرالیێ بوو، ئیرۆ 3یێ گولانێ پشتی 18 رۆژان مانا ل نەخوەشخانەیێ، کۆچا داویێ کر.

سڕی سورەییا ئۆندەر د سالا 1962 دە ل پارێزگەھا سەمسوورێ یا باکورێ کوردستانێ ژ دایک بووبوو و ل زانینگەھا ئەنقەرەیێ بەشا زانستێن سیاسی خوەندبوو.