پارتیا وەلاتپارێزێن کوردستانێ (PWK)ێ ب بۆنەیا سالڤەگەرا دەستپێکرنا قرکرنا دێرسمێ داخویانیەک نڤیسکی بەلاڤ کر.
داخویانیا PWK وەھایە:
88 سال بەرێ، رۆژا 4 گولانێ بریارا ئێریشا لەشکەری یا قرکرنا ملەتەکی کو ژ ئالییێ م. ک. ئاتاتورک و فەوزی چاکماک ڤە ھاتبوو پەژراندن، ھاتە داین.
ل سەر ‘بریارا شاندا وەزارەتێ یا تەڤگەرا تەنقیلیا دێرسمێ’ کو د 4ێ گولانا 1937 دە ھاتبوو ستەندن، د 12ێ گولانا 1937 دە ھێزێن لەشکەری یێن کۆمارا ترکییەیێ دێرسم داگیر کر و کەڤر ل سەر کەڤری نەھشتن.
د ڤێ بریارنامەیێ دە تێ گۆتن کو ‘دێ گەلێ ھەرێمێ هێت کۆمکرن و نەقلی دەڤەرەک دن هێت کرن. ئەڤ ئۆپەراسیۆنا کۆمکرنێ دێ بگرە سەر گوندان، ھەم چەک و سیلەحان کۆم بکە و ھەم ژی کەسێن ھاتنە کۆمکرن کۆچبەری دەڤەرێن دن بکە.’
دیسا د بریارنامەیێ دە تێ گۆتن کو ‘ھەگەر ئەم تەنێ ب ئێریشێ قیما خوە بینن دێ چاڤکانییێن سەرھلدانێ د شوونا خوە دە بمینن. لۆما ژی دڤێت ئەم ئەو کەسێن کو چەک ب کار ئانینە و تینن، د جیھ دە و ژ بنی دە ژ ھۆلێ راکن، گوندان ب تەڤاھی وێران بکن و مالباتێن وان دوور بخینن’.
بێگوومان، ئەڤ بریارنامە ژ بەر باوەری و ناسمەیا وی، بریار و ئەمرێ ژھۆلێ راکرنا ملەتەکی بوو. دەولەتا ترکییەیێ ب ناڤێ ھلدانا ژ بۆ لەشکەرییێ بەشەکی مەزن ژ خەلکێ ھەرێمێ کر لەشکەر؛ کەسێن کو دکاریبوون رێبەرییا گەل بکن و د ناڤ خەلکێ دە خوەدی روومەت بوون ژی کۆم کرن و ژ بۆ پێوەندییێن وان ب ھەڤدوو نەمینن، ئەو کۆچبەری باژارێن جوودایێن ترکییەیێ کرن و ئەو نەچاری ‘ئیقامەتا مەجبووری’ کر. پشتی وێ ژی ئۆپەراسیۆنا قرکرنێ دەست پێ کر و بێ کو فەرقەکێ د ناڤ وان دا بکە، گەلێ دێرسمێ قر کر.
سەرۆکێ ئاساییشا مالاتیایێ یێ وێ دەمێ ئیحسان سەبری چاگلایانگیل د بیرئانینێن خوە دە دانپێدانێ دکە کو ژن و زارۆکێن کو ژ زلمێ فلتیبوون و رەڤییابوون شکەفتان، د وان شکەفتان دە ب “ژەھرا مشکان” ھاتن قەتلکرن. ژن و کەچێن دێرسمێ ژ بۆ نەکەڤن دەستێن لەشکەران خوە ژ زنارێن بلند داڤێتن چەمێ مونزوورێ. لەشکەران ھندەک زارۆکێن سێوی ژی دبرن باژارێن خوە و ئەو وەکە ملەتەکی دن خوەدی دکرن.
جینۆسایدا دێرسمێ، خەلەکەک ژ سییاسەتا ژ ھۆلێ راکرنا ملەتێ کوردە. ئەڤ پێڤاژۆ سالا 1921 ب شکاندنا بەرخوەدانا کۆچگیرییێ دەست پێ کر و د 1937-1938 ب قرکرنا گەلێ دێرسمێ بەردەوام کر. وەکە کو د بریارنامەیێ دە ھاتییە گۆتن، ھەموو جیھ و وارێن بەرخوەدانا گەلێ کوردستانێ یەک ب یەک ھاتن ئیمھاکرن.
ژ بەر قرکرن و سووچێن کو ل ھەمبەر گەلێ دێرسمێ و کوردستانێ کرییە، دڤێت دەولەتا ترکییێ دۆزا لێبوورێنێ بکە و ل گۆری ڤێ راستێیێ گاڤێن پێویست باڤێژە. وەکە گاڤا پێشی، دەولەتا ترکییەیێ دکارە ب ئەشکەرەکرنا مەزەلێن سەرۆک و رێبەرێن تەڤگەرێن کوردان سەید رزا، شێخ سەعید و یێن دن و سەیدێ نوورسی کو ھەتا نھا ب دزی گرتییە، دەست پێ بکە.
د 88ەمین سالڤەگەرا دەستپێکا جینۆسایدا دێرسمێ دە، ئەم جینۆسایدا دێرسمێ و ھەموو قرکرن و جینۆسایدێن ل ھەمبەری گەلێ کوردستانێ پێک ھاتنە پرۆتەستۆ دکن و روورەش دکن. ئەم ھەموو شەھید و پاکرەوانێن کوردستانێ ب رێزداری ب بیر تینن. خەبات و تێکۆشینا وان دێ رێیا خەبات و تێکۆشینا ملەتێ کورد یا ژ بۆ سەرخوەبوون، ئازادی و دەمۆکراسییێ رۆھنی بکە.
4/5/2025
نڤێسینگەها راگھاندنێ یا پارتییا وەلاتپارێزێن کوردستانێ (PWK)
