تەرمێ سەرۆکوەکیلێ پارلامەنتۆیا ترکییێ و ئەندامێ شاندەیا ئیمرالیێ یێ دەم پارتیێ سڕی سورەیا ئۆندەر، ئیرۆ 4ێ گولانێ ب بەشداریا ب ھەزاران کەسان ل ستەنبۆلێ ب مەراسیمەکا گرسەیی ھات ئۆغرکرن.
مەراسیما خاترخواستنێ د دەمژمێر 10:00 دە ل ناڤەندا چاندی یا ئەتاتورک (ئاکم) ل ستەنبۆلێ دەست پێ کر. ب ھەزاران کەس د ناڤ دە بەرپرسێن پارتیا وەکھەڤی و دەمۆکراسیێ یا گەلان (دەم پارتی) و پارتیێن دن، نوونەرێن رێخستنێن جڤاکا سڤیل، رەوشەنبیر، ھونەرمەند، مالبات و حەزکریێن ئۆندەر ئامادە بوون.
د مەراسیمێ دە پەیامێن ھندەک بەرپرسێن حکوومەت و پارتیان ھاتن خوەندن، یەک ژ وان پەیاما سەرۆک مەسعوود بارزانی بوو.
سەرۆک بارزانی د پەیاما خوە دە گۆت: “ب خەمگینیەکا مەزن نووچەیا کۆچا داوی یا کەسایەتی و سیاسەتمەدارێ ترکییێ، ھەڤسەرۆکێ بەرێ یێ دەم پارتیێ و وەکیلێ سەرۆکێ پارلامەنتۆیا ترکیەیێ (سڕی سورەیا ئۆندەر) گھیشتە من.”
سەرۆک بارزانی ھەروھا دبێژە: “خوەدێژێرازی سڕی سورەیا ئۆندەر، کو ئەندامێ شاندا ئیمرالیێ ژی بوو، بەشەکا مەزن یا ژیانا خوە ژ بۆ خەباتا سیاسی و ئاشتییانە تەرخان کر و ھەولێن وی یێن د ئاراستەیا چارەسەریا ئاشتی ل ترکییێ دە جھێ پێزانینەکا مەزنە.”
د بەشەکا دن یا پەیامێ دە ھاتیە: “ئەز پرسە و سەرساخیێن خوە پێشکێشی مالبات، کەسووکار، دۆست، ھەڤال و ھەمفکرێن خوەدێژێرازی سڕی سورەیا ئۆندەر و ھەروھا سەرکرداتی، ئەندام و ئالیگرێن دەم پارتیێ دکم و خوە وەک ھەڤپارێ خەما وان دزانم.”
سڕی سورەیا ئۆندەر، وەکیلێ سەرۆکێ پارلامەنتۆیا ترکییێ و پارلامەنتەرێ پارتیا وەکھەڤی و دەمۆکراسیێ یا گەلان (دەم پارتی)، کو د ھەمان دەمێ دە ئەندامێ شاندا ئیمرالیێ بوو، دوهی 3 گولانێ پشتی 18 رۆژان مانا ل نەخوەشخانەیێ، کۆچا داویێ کر.
سڕی سورەیا ئۆندەر د سالا 1962 دە ل پارێزگەھا سەمسوورێ یا باکورێ کوردستانێ ژ دایک بووبوو و ل زانینگەھا ئەنقەرەیێ بەشا زانستێن سیاسی خوەندبوو.
