رۆژنامەیا «تورکیە» یا نێزیکی دەستهلاتداریێ، ژ زارێ ژێدەرەکی پایەبلندێ ئاک پارتیێ راگهاند، هەفتەیا بۆری په‌كه‌كێ کۆنگرەیا خوە لدار خستیە و تێ دە بریارا خوەهلوەشاندنێ و دانینا چەکان دایە. رۆژنامەیێ دایە زانین ژی، پشتی ڤێ قۆناغێ، دێ پێنگاڤێن نوو یێن یاسایی دەربارێ پێڤاژۆیێ دە بێن ئاڤێتن.
ل گۆری هەمان رۆژنامەیێ، سەدەما کو په‌كه‌كێ هەتا نها لدارخستنا کۆنگرەیێ ژ رایا گشتی رە ئەشکەرە نەکریە، کۆچا داوی یا سڕی سورەییا ئۆندەر ە، کو ئەندامێ شاندا ئیمرالیێ یێ دەم پارتیێ بوو. دیار کر ژی، «په‌كه‌كه دێ د چەند رۆژێن پێش دە ب خوە راگهینە کو کۆنگرە لدار خستیە».
رۆژنامەیێ هەروها راگهاندیە، رەشنڤیسەکە بەرنامەیەکێ ژ ئالیێ ئاک پارتیێ و یەکەیێن پێوەندیدارێن دەولەتێ ڤە دەربارێ وان پێنگاڤێن یاسایی یێن کو د هەیاما پێش دە ژ بۆ پێڤاژۆیێ دێ بێن ئاڤێتن، هاتیە ئامادەکرن. هات راگهاندن کو یەکەیێن ئەولەهیێ دەربارێ ڤان ئامادەکاریان دە ل گەل رێبەرێ په‌كه‌كێ ئابدوڵاهـ ئۆجالان جڤیانە.
ژێدەرێن ژ ئاک پارتیێ ژ وێ رۆژنامەیێ رە راگهاندنە، ئەو دەمەکە کار ل سەر وان پێنگاڤێن کو دڤێ دەربارێ مژارێن یاسایی یێن پێڤاژۆیێ دە بێن ئاڤێتن، دکن و رەشنڤیسەک دەربارێ کا دێ چ پێنگاڤ ژ بۆ پێڤاژۆیێ بێن ئاڤێتن، ئامادە کرنە. ل گۆری ژێدەران ژی، پشتی داخویانیا خوەهلوەشاندنا په‌كه‌كێ، ئەوێ وەک دەستهلاتدار دێ ڤان پێنگاڤان د قۆناغا بێ دە راگهینن.
رۆژنامەیا “تورکیە” ئاماژە ب وێ یەکێ ژی کر، دێ هن پێنگاڤێن نوو دەربارێ ئۆجالان دە بێن ئاڤێتن و ئەفسەرک ژ بۆ وی بێ تایینکرن کو ئالیکاریا وی بکە، هەروها دێ شەرت و مەرجێن کارێ وی باشتر بێن کرن. لگەل ڤێ یەکێ، دێ رێ بێ دایین کو ئەو ب کەسێن کو دخوازە رە بجڤە و ئۆجالان دێ جڤینێن زێدەتر ب دەم پارتیێ و مالباتا خوە رە پێک بینە.
ل گۆری رۆژنامەیێ، ئۆجالان ب خوە د گوفتووگۆیێن خوە یێن لگەل بەرپرسێن دەولەتێ دە راگهاندیە، ژ بەر کو دەما ژ زندانێ دەرکەڤە دێ کێشەیێن ئەولەهیێ ژێ رە چێببن، لەوما ناخوازە زندانا ئیمرالیێ بجیهـ بهێلە.
ئەڤ ئیدیئا د دەمەکێ دە تێن، سەرۆکۆمارێ ترکیێ رەجەپ تاییپ ئەردۆگان دوهـ ل گەل بەشەک ژ پارلەمەنتەرێن ئاک پارتیێ و وەزیرێن کابینەیا خوە راگهاندبوو کو وان هەموو ئاستەنگ دەرباس کرنە و گۆتبوو، “ئیرۆ بە یان سبە، په‌كه‌كه دێ چەکێن خوە دەینە و رێخستنێ هلوەشینە».
