نهێنی و تایبه‌ت: بریارێن كۆنگره‌یا 12 یا په‌كه‌كێ
رێخستنا په‌كه‌كێ كۆنگره‌یا خوه یا 12 گرێدا و 4 بریارێن گرینگ گرتنه، بریار بۆ ئیمرالیێ هاتنه شاندن و پاش كو ئۆجالان په‌سه‌ند بكه، وێ د دو رۆژێن پێش مه ده ژ رایا گشتی ره بێن راگهاندن.
27 سباتا ئیسال 2025ێ رێبه‌رێ زیندانكری یێ په‌كه‌كێ عه‌بدوللا ئۆجالان، بانگا چه‌كدانینێ و خوه‌فه‌سخكرنێ ل په‌كه‌كێ كر، ئۆجالان د چارچووڤه‌یا پێشنیازا ده‌وله‌ت باخچه‌لی ده ئه‌ڤ هه‌نگاڤ ئاڤێت و 50 سالێن خه‌بات و تێكۆشینا گه‌لێ كورد ل باكورێ كوردستانێ وه‌ندا كرن.
وه‌نداكرنا 50 سالێن تێكۆشینا گه‌لێ كورد
په‌كه‌كێ ل سه‌ر بانگا ئۆجالان د هه‌نگاڤا یه‌كه‌م ده ئاگربه‌ستا ته‌كئالی ل گه‌ل ده‌وله‌تا ترك راگهاند و بانگا رێبه‌رێ خوه یا كو ت داخوازیه‌ك ژ بۆی كوردان تێ ده تونه ب دیرۆكی ناڤ كر و شاهی و دیلان ل هه‌ر ده‌رێ گرێدان.
ته‌ڤی ئاگربه‌ستا په‌كه‌كێ ئێریشێن ده‌وله‌تا ترك هه‌یا دوهـ رۆژا 8 گولانا 2025ان ده‌وام كرن، ل وێ رۆژێ ده‌ما كو په‌كه‌كێ ل بنارا قه‌ندیلێ ژ بۆی بجیهكرنا فه‌رمانا باخچه‌لی كۆنگره‌یا خوه یا 12مین برێڤه‌دبر، بالافرێن ده‌وله‌تا ترك چیایێن باشوورێ كوردستانێ بۆمبه‌باران دكرن.
رێخستنا په‌كه‌كێ ئیرۆ 9 گولانا 2025ێ راگهاند كو وان كۆنگره‌یا خوه گرێدایه و بریارێن گرینگ گرتنه و ل ده‌مه‌كه نێز وێ ژ بۆی رایا گشتی بێن پارڤه‌كرن.
داركا مازی ده‌ربارێ ناڤه‌رۆكا بریارێن كۆنگره‌یا 12مین یا په‌كه‌كێ، ئاگاهی ده‌ست خستن.
یه‌كخستنا نێرینا ئه‌ندامێن سه‌ركردایه‌تیا په‌كه‌كێ
چاڤكانیێن مه ئاشكه‌ره كرن، ژ به‌ری جڤینا یه‌كه‌م یا كۆنگره‌یا په‌كه‌كێ، رێبه‌رتییا رێخستنێ هه‌ژماره‌كه جڤینان ژ بۆی یه‌كخستنا نێرینا ئه‌ندام و سه‌ركردایه‌تیا په‌كه‌كێ ئه‌نجام دا نه، پشتره رۆژا 8ی گۆلانا 2025ان ل بنارا قه‌ندیلێ ب ئاماده‌بوونا 40 ئه‌ندامێن سه‌ركردایه‌تیێ، رێخستنا په‌كه‌كێ كۆنگره‌یا خوه یا 12 گرێدا.
ل گۆری ئاگاهیێن ده‌ستێ مه سه‌ركردایه‌تییا په‌كه‌كێ 4 بریارێن گرینگ د كۆنگره‌یێ ده گرتنه.
بریارێن كۆنگره‌یا 12مین ووسانه:
خه‌بات و تێكۆشینا چه‌كداری یا په‌كه‌كێ ل دژی دوله‌تا ترك بێن ب داوی كرن و ب رییێن سیاسی و قانوونێ به‌رده‌وامی ب خه‌باتێ بێ كرن.
په‌كه‌كێ خوه هه‌لوه‌شاند.
چه‌كێن خوه وێ راده‌ست بكن و ژ بۆی چه‌كدارێن باكورێ كوردستانێ كۆمیته‌یه‌كه هه‌ڤبه‌ش ل نێڤبه‌را تركیه‌یێ و په‌كه‌كێ وه‌ره پێكئانین.
نابه ل ت پارچه‌یه‌كا كوردستانێ ل ژێر ناڤێ په‌كه‌كێ چالاكیێن سه‌ربازی و سیاسی یێن ئه‌نجام دایین.
رێخستنا په‌كه‌كێ د جڤینا كۆنگره‌یا خوه ده راگهاند كو ئه‌ڤ بریار رۆژا 9ی گۆلانا 2025ێ بۆ ئیمرالیێ بێن شاندن ژ بۆ كو ژ هێلا عه‌بدوللا ئۆجالان ڤه بێن په‌ژراندن.
چاڤكانیێن مه ئاشكه‌ره كرن، تێ پێشبینی كرن سوبه رۆژا 10 گولانێ یان رۆژا 11 گولانێ ئه‌ڤ بریارێن كۆنگره‌یا 12مین یا په‌كه‌كێ، د كۆنفه‌رانسه‌كه رۆژنامه‌ڤانی ده ژ رایا گشتی ره بێن پارڤه‌كرن.
چاره‌نووسا چه‌كدارێن ل هه‌رێما كوردستانێ
تشتێ بالكێش كو د بریارێن كۆنگره‌یا 12مین ده، د بریارا چه‌كدانینێ و پێكئانینا كۆمیته‌یا هه‌ڤبه‌ش یا نێڤبه‌را په‌كه‌كێ و ده‌وله‌تا ترك ده، به‌حسا چه‌كدارێن رێخستنێ یێن ل باشوورێ كوردستانێ تونه، ئانگو بریارێ گۆتیه كو ژ بۆی چه‌كدارێن ل باكورێ كوردستانێ كۆمیته وێ وه‌ره پێكئانین!.
ره‌جه‌ب تاییب ئاردۆگان دو رۆژان به‌رێ راگهاند بوو؛ ئیرۆ یان سوبه په‌كه‌كه وێ چه‌كان ده‌ینه و ده‌وله‌تا مه وێ بكه‌ڤه د قوناغه‌كه نوو ده.
پێنگاڤێن نوو یێن پێڤاژۆیێ
تاییپ ئەردۆگان ئه‌ڤ یێك د جڤینه‌كه ل گەل بەشەک ژ پارلەمەنتەرێن ئاک پارتیێ و وەزیرێن کابینەیا خوە ده راگهاندبوو و گۆت كو وان هەموو ئاستەنگ دەرباس کرنە، ئیرۆ بە یان سبە، په‌كه‌كه دێ چەکێن خوە دەینە و رێخستنێ هلوەشینە.
رۆژنامەیا «تورکیە» یا نێزی دەستهلاتداریێ ژی ئیرۆ ژ زارێ ژێدەرەکی پایەبلندێ ئاک پارتیێ راگهاند، هەفتەیا بۆری په‌كه‌كێ کۆنگرەیا خوە لدار خستیە و تێ دە بریارا خوەهلوەشاندنێ و دانینا چەکان دایە. رۆژنامەیێ دایە زانین ژی، پشتی ڤێ قۆناغێ، دێ پێنگاڤێن نوو یێن یاسایی دەربارێ پێڤاژۆیێ دە بێن ئاڤێتن.
