پێڤاژۆیا “ئاڤاکرنا ترکیەیەک بێ تەرۆر” کو ب بانگا سەرۆکێ مەھەپێ دەولەت باخچەلی دەست پێ کر، گھیشتیە قۆناغێن خوە یێن داوی. پشتی بانگا سەرۆکێ پەکەکێ عەبدوللاھ ئۆجالان یا ژ بۆ دانینا چەکان، پەکەکێ داخویاکرن کو وان کۆنگرەیا خوە د 5-7 گولانێ دە لدارخستیە.
داخویانیا یەکەم یا پەکەکێ
د داخویانیا خوەیا دەربارێ کۆنگرەیێ دە، پەکەکێ دیار کر کو بریارێن کو ھاتنە گرتن دێ ژ بۆ رایا گشتی هێن راگھاندن؛ “ئاگاھداری و بەلگەیێن بەرفرەھێن دەربارێ ئەنجامێن کۆنگرەیا 12ێ یا پەکەکێ و بریارێن ھاتنە گرتن، دێ د دەمەک کورت دە پشتی کو ئەنجامێن ل دو دەڤەرێن جودا وەرن بەرھەڤکرن، لگەل رایا گشتی هێن پارڤەکرن.”
ژ ئالیەکی دن ڤە، کۆنگرەیا پەکەکێ بوویە یەک ژ مژارێن سەرەکی یێن رۆژەڤا سیاسی. ئەندامێ شاندا ئیمرالیێ یا پارتیا دەمێ ئەحمەد تورک د وەشانا زندی یا تیڤی 100 دە دەربارێ لدارخستنا کۆنگرەیا پەکەکێ دە داخویانی دا.
تورک گۆت، “ل ترکیەیێ پێدڤی ب ئاشتیا جڤاکی ھەبوو، ئیرۆ، ژ بەر کو ئەم دبینن کو ئاشتی نەچارە و ھەموو گەلێ مە دێ ل ترکیەیەکا دەمۆکراتیک بەختەوار بە، مە ھندەک دەستپێشخەری کرن و ھندەک خەبات پێک ئانین. و ئیرۆ، ئەنجامەک باش دەرکەت ھۆلێ. ل ئیرلاندایێ، دەما کو ئاشتی پێک ھات، ژێ رە گۆتن ‘ئینیا پیرۆز’. ئیرۆ ژی ئینیا پیرۆزە. وەرن ئەم بریارا ئیرۆ وەکی ‘ئینیا پیرۆزع’ ب ناڤ بکن.”
“بێ گومان، گرینگە کو پەکەکە کۆنگرەیا خوە ل دار بخە و بریارەک ئەرێنی بدە. لێ ئەرکێن مە ژی ھەنە. دڤێت ئیرۆ گاڤێن کو ژ بۆ ترکیەیەک دەمۆکراتیک وەرن ئاڤێتن، د مەجلیسێ دە وەرن رۆژەڤێ. بێ گومان، ئەم نە تەنێ وەکی ‘پرسگرێکا کورد’ ل ڤرن، ترکیا پێدڤیا وێ ب پێشەرۆژەک دەمۆکراتیک ھەیە. ئەز باوەر دکم کو ئەم دێ ھەموو د وەلاتەکی دەمۆکراتیک دە بەختەوار بن. ئەز دخوازم کو ئەڤ پێڤاژۆ سوودمەند بە.
رۆلا ھەری مەزن یا دەولەت باخچەلی یە. ڤەکرنا ڤی دەری و بانگەوازیا بۆ ترکیەیێ ریسکەک گرینگ بوو. لێ وی ئەڤ بەرپرسیاری گرت سەر ملێ خوە، ژ بەر کو ل سەر پێشەرۆژا ترکیەیێ دفکری. ئیرۆ ئەم دبینن کو ریسکا کو وی گرتی، بەشدارییەکە گرینگ د پێکھاتنا ئاشتیەکا بروومەت دە کر.
“ئیرۆ برێز باخچەلی گازی من کر”
برێز باخچەلی ئیرۆ ل گەل من ئاخڤی و گۆت “بلا ئەڤ پێڤاژۆ ل سەر خێرێ بە” وی پیرۆزباھی ل مە کر. ئەز ژی پیرۆزباھیێ ل برێز دەولەت باخچەلی دکم و رێز و حورمەتەکە مەزن ژ بۆ ھەولدانێن وی دگرم.”
