سەرۆکوەزیرێ ھەرێما کوردستانێ مەسروور بارزانی تەکەز دکە کو د مژارا مووچەیان دە حکوومەتا ھەرێما کوردستانێ ھەموو بەرپرسیاریێن خوە ب جھ ئانینە و داخواز ژ حکوومەتا فەدەرالی دکە کو مژارا مووچەیان نەکە پرسگرێکەکە سیاسی.
سەرۆکوەزیر مەسروور بارزانی ئیرۆ 11ێ گولانێ ل تاخا بەرۆشکێ یا باژارێ دھۆکێ سەردانا پرۆژەیا رۆناھی یا ئەلەکتریکێ یا 24 دەمژمێری کر. د چارچۆڤەیا سەردانا خوە دە، سەرۆکوەزیر د داخویانیەکا رۆژنامەڤانی دە بەحسا پرۆژەیێ و مووچەیێ مەھا نیسانێ یێ فەرمانبەرێن ھەرێما کوردستانێ کر.
سەرۆکوەزیر مەسروور بارزانی گۆت: “ھەولدانێن مە لگەل حکوومەتا فەدەرالی ژ بۆ دابینکرنا مافێن خەلکێ ھەرێما کوردستانێ بەردەوامن. سپاسیا خوەراگری و سەبرا فەرمانبەر و خەلکێ ھەرێما کوردستانێ دکم کو ھەتا نھا گەلەک ب سەبر بوونە، لێ پێویستە ئەو ژی بزانبن کو حکوومەتا فەدەرالییە کو ھەتا نھا مووچە نەشاندیە.”
تەکەز کر: “د مژارا مووچەیێ فەرمانبەران دە حکوومەتا ھەرێما کوردستانێ ھەموو ئەرکێن خوە ب جھ ئانینە. ئەم ھێڤیدارین حکوومەتا فەدەرالی ژی بهێتە پێش و ئەو ژی ئەرکێن خوە ب جھ بینن و ئێدی مژارا مووچەیێ نەکن پرسگرێکەکا سیاسی و وەک زەخت ل دژی ھەرێما کوردستانێ بکار نەینن. ئەم ھێڤیدارین د زووترین دەم دە مووچە بێن خەرجکرن و ئەم ژی ل بەندێ نە.”
زێدەتری 45 رۆژانە وەزارەتا دارایی یا حکوومەتا ئیراقێ مووچەیێ مەھا نیسانێ یێ فەرمانبەرێن ھەرێما کوردستانێ نەشاندیە، تەڤی کو زێدەتری 20 رۆژانە لیستەیا مووچەیێ فەرمانبەر و مووچەخوارێن ھەرێما کوردستانێ ژ رۆژا 22-04-2025 ڤە، ژ ئالیێ تیما تەکنیکی یا وەزارەتا دارایی و ئابۆری یا ھەرێما کوردستانێ ڤە رادەستی فەرمانگەھا ژمێریاریێ یا وەزارەتا دارایی یا حکوومەتا فەدەرال ھاتیە کرن.
ھەمان رۆژێ، بەشا خەزینەیا فەدەرالی ژ داھاتا نە-پەترۆلی یا ھەرێما کوردستانێ ژ بۆ مەھا ئادارێ یا ئیسال، کو ب قاسی 48 ملیار و 205 ملیۆن و 765 ھەزار دینارە، ب شێوەیەکی کاش خستە سەر حەسابێ بانکی یا وەزارەتا دارایی یا حکوومەتا فەدەرال ل شاخا ھەولێرێ یا بانکا ناڤەندی یا ئیراقێ.
