پەکەکێ د کۆنگرەیا خوە یا 12ێ دە، بریارا خوە هلوەشاندنێ و دەست ژێ بەردانا چەکان دا و ئەڤ یەک ژ رایا گشتی رە راگھاند.
ب ڤێ پێشکەتنێ، قۆناغەک گرینگ دەستپێکریە. لێ ھێژان گەلەک پرس ھەنە کو، نە زەلالن.
مەدیا ترکی دبێژە کو، د پێڤاژۆیا ترکیەیەک بێتەرۆر دە قۆناغەکا نوو دەست پێ کر. قۆناغا بێچەککرنێ تێ ئارمانجکرن کو د ناڤ 3-4 مەھان دە ب داوی وەرە.
ل گۆرا داخویانیێن رایەدارێن دەولەتێ، ئەڤ پێڤاژۆیە ب بانگا سەرۆکێ مەھەپێ دەستپێکریە، ئەڤ پێڤاژۆ وەک پێڤاژۆیا “ترکیەیا بێ تەرۆر” ھاتە بناڤکرن، د بن کۆنترۆلا دەولەتێ دەیە و ل گۆری پلانێ پێشڤە دچە.
پرسا ھەری گرینگ د ڤێ پێڤاژۆیێ دە کو ژ ئالیێ سەرۆکێ میتێ ئیبراھیم کالن ب خوە ڤە دھات برێڤەبرن ئەڤ بوو: “گەلۆ لگەل رێخستنا تەرۆریست دانوستاندنەک ھەبوو؟ چ قەرەبوو ھاتن دایین؟” نڤیسکارێ رۆژنامەیا حوڕیەتێ نەدیم شەنەر، ھەڤپەیڤینەک کو وی لگەل رایەدارەکی کو ناڤێ وی نەھاتیە ئەشکەرەکرن ل سەر ڤێ مژارێ کریە، بۆ خوەندەڤانێن خوە پارڤە کر، پرسێن کو رایا گشتی مەراق دکرن پرسین و بەرسڤێن وی لگەل خوەندەڤانێن خوە پارڤە کرین ب ڤی ئاوایینە..
1- پرس: گەلۆ د بەردێلا خوەھلوەشاندنا پەکەکێ و دانینا چەکان دە، چ بازار، سۆز یان قەرەبوو ھاتن دایین؟
بەرسڤ: نا، قەت ئەڤ یەک نەبوویە، دەولەتا ترکیەیێ ئەڤ خەبات دا دەستپێکرن. ژ بەر کو ترکیە د تێکۆشینا ل دژی تەرۆرێ دە سەرکەفتی بوو، رێخستنا تەرۆرێ نکاریبوو دەرکەڤە دەرڤەیی وەلات. ھەر وھا شەرت و مەرجێن ناڤنەتەوەیی ل دژی وان دەست پێ کرن. ژ بەر ڤێ یەکێ، ژ بلی بداویکرنا پەیمانێ چارەیەک دن نەما و چ مژارەک دانوستاندنێ ژی نەھات رۆژەڤێ. ئەو ب خوە ژی ژ نھا ڤە داخویانیان ددن و دبێژن کو بازاری تونەیە. دەولەت د چارچۆڤەیا کو ژ خوە رە ئامادە کریە دە، دمەشە.
2- پرس: بریارا ھلوەشاندنا پەکەکێ ژ بۆ پێکھاتەیێن دن یێن رێخستنێ ژی دەرباس دبە؟
بەرسڤ: بەلێ، ژ بەر کو رێخستنا تەرۆریست یا پەکەکێ ئاڤاھیا وێ یا سەیوانی یە. دەما کو پەکەکە خوە هلدوەشینە، یێن دن ژی هلوەشاندی تێن هەژمارتن. ب گۆتنەکا دن، ل گۆری ترکیەیێ، ئەڤ بریار نە تەنێ ل ئیراقێ، لێ د ھەمان دەمێ دە ل ئیران، سووریە و ھەتا ل ئەورۆپایێ ژی ژ ھۆلێ راکرنا ئاڤاھیێن رێخستنا تەرۆریستی یا پەکەکێ فەرز دکە. ڤەبژێرکەک دن نایێ قەبوولکرن. ھەتا وێ ئەڤ یەک ب بالداری وەرە شۆپاندن کا گەلۆ ئاڤاھیێن رێخستنی دێ ب گوھەرتنا ناڤێن خوە چالاکیێن خوە بدۆمینن یان نا.
3- پرس: چاوا دێ وەرە کۆنترۆل کرن کا گەلۆ پەکەکە ب تەڤاھی ب بریارا چەکبەردان و ھلوەشاندنێ پابەندە؟
بەرسڤ: ئەو ژی کارێ مەیە. ئیستیخباراتا ترکیێ خوەدی گەلەک ئەزموونە. تیمێن مەیێن تەکنیکی یێن خوەدی ئەزموون ل سەر ڤێ پرسگرێکێ دخەبتن. سەرۆکێ تەشکیلاتا ئیستخباراتا نەتەوەیی ئیبراھیم کالن ژ نھا ڤە د دەستپێکا پێڤاژۆیێ دەیە. پێڤاژۆ دێ گاڤ ب گاڤ وەرە شۆپاندن و د وەختێ خوە دە ژ سەرۆکۆمار ئەردۆگان رە وەرە راگھاندن.
4- پرس: گەلۆ ژ بۆ تەرۆریستێن پەکەکێ عەفوویەک ھەیە؟
بەرسڤ: ت رامان، ئامادەکاری یان کارەکی وەکی بەخشاندنێ تونەیە. ئەو کەسێن کو تەڤلی تاوانێن ل دژی ترکیەیێ دبن دێ بێن سزادان. بێ گومان، ئاڤێتنا گاڤێن کو دێ خزمەتا ئاشتیا جڤاکی بکن، وارێ سیاسەتێ یە. لێ بەلێ، وەکی کو ھندەک کەس ئیدیعا دکن، چ گاڤێن کو زرارێ بدن یەکیتیا مەیا نەتەوەیی چێنابن.
5- پرس: گەر تشتەک بەرەڤاژی بانگ و بریارێن ھاتنە دایین ببە، ئانگۆ گەر پەکەکە دیسا ب ناڤێ خوە یان ژی ب ناڤەکی دن ئێریشان بکە، دێ چ ببە؟
بەرسڤ: کۆمارا ترکیەیێ ژ دەستپێکێ ڤە نە تەنێ پلانێن “A”، لێ ھەر وھا پلانێن “B” و “C” ژی ئامادە کرنە، و هێژ پتر ژی. ب گۆتنەکا دن، پلانێن مە ھەنە کو ل سەر بنگەھا بریارا بداویکرنێ و رادەستکرنا چەکان، رادەستنەکرنا چەکان تەڤی بریارا بداویکرنێ، یان ژی بەردەوامیا چالاکیێن تەرۆریستی د بن ناڤێن جوودا دە، و ھتد. ھەروھا، ژ بەر کو تەھدیدا تەرۆرێ ل ھەرێمێ ژ ھۆلێ نەھاتیە راکرن، تێکۆشینا ھێزێن چەکدارێن ترکیەیێ و رێخستنا مەیا ئیستیخباراتێ بێناڤبەر بەردەوام دکە. یا گرینگتر ئەوە کو رێخستنا تەرۆریست بریارێن کو دانە بجیھ بینە. ئەڤ پێڤاژۆ دێ ب بالداری هێت شۆپاندن.
