مەمەد مێردینی
کۆنگرەیا 12ەمین یا پەکەکێ کو ب بانگا ئۆجالان د چارچۆڤەیا پێڤاژۆیا “ترکیەیا بێ تەرۆر” کو دەولەت باخچەلی دایە دەستپێکرن، هات لدارخستن، د کۆنگرەیا خوە دە پەکەکێ راگهاند کو ئەو دەست ژ خەباتا لەشکەری بەر ددن و ژ ڤڕ پێ دە نابە ت کەس و رێخستن د بن ناڤێ وان دە چەک هلگرن و شەر بکن، ئەڤ یەک ل بەر چاڤێن گەل هات کرن، ئەڤ هەلوەستا پەکەکێ ب زەلالی هەر کەسێ مێزە کر و ب چاڤێ سەرێ خوە دیت، لێ بەلێ پەکەکە بێی کو شەرم و فەدی بکە ب رێیا ئالیگرێن خوە د سۆسیال مەدیایێ دە دخوازە دیسا ب دەرەو و ئیفترا کوردان بخاپینە و ڤێ شکەستنا خوە ژی وەکە دەستکەفتەک دیرۆکی ب گەل بدە باوەرکرن.
بەلێ، د کۆنگرەیا 12ەمین یا پەکەکێ دە ئەڤ سێ بریار ب ئاوایەکی زەلال هاتن دایین و پەکەکێ ب خوە د داخویانیا داوی یا کۆنگرەیێ دە ئەشکەرە کر و گۆت، “کۆنگرەیێ بریار ستەند کو پەکەکێ وەرە ھلوەشاندن و رێبازا تێکۆشینا چەکداری ب داوی ببە. پێڤاژۆیا پراکتیکی ژ ھێلا رێبەر ئاپۆ ڤە وەرە برێڤەبرن و مەشاندن. ب ڤی ئاوایی خەباتا کو د بن ناڤێ پەکەکێ دە دھات مەشاندن ب داوی ببە.” لێ بەلێ دیسا ژی پەکەکە دخوازە ب دەرە و ئیفتیرایان گەلێ کورد ب گشتی و ئالیگرێن خوە ب تایبەتی د سۆسیال مەدیایێ دە بخاپینە و وسا ب وان بدە باوەرکرن کو ئەڤ پێڤاژۆ ژ دەرڤەی حەز و خواستەکا ئۆجالان تێ برێڤەبرن و ئۆجالان ناخوازە چەک بێن دانین…! لۆما ب پارڤەکرنا دەرەوان لیستکەک پیس و گەمار دمەشینە و دخوازە دیسا روویێ رەش یێ خیانەتا رێبەرێ خوە ڤەشێرە.
پشتی خواندنا داخویانیا داوی یا کۆنگرەیێ، پەکەکێ ب ئاوایەک سیستەماتیک ب رێیا ئالیگرێن خوە یێن د سۆسیال مەدیایێ دە دەست ب کامپانیایەکا دەرەوێن وەکە، “ئۆجالان دبێژە، گەر جارەکی ب ناڤێ من داخوازا دەست ژ چەکان بەردانێ هات کرن، وێ دەمێ بزانبن ئەو نە ئەزم، رۆژهلاتا ناڤین سفرەیا گوورگانە و گەر تو گوورگ نەبی جیێ تە ل سەر وێ سفرەیێ ناکە، گەر زلامێن کورد ژی دەست ژ چەکان بەردن نابە ژنێن کورد دەست ژ چەکان بەردن و ژ چیا بێن خوار…. هتد” کریە. یێ کو پەکەکێ ناس دکە دزانە کو ئەڤ نە یەکەمجارە پەکەکە دخوازە ب ڤان دەرەوان روویێن رەش یێن خوە و رێبەرێ خوە سپی بکە، پەکەکە ئێدی گهشتیە وێ باوەریێ کو داویا وێ هاتیە، رەخمی ڤێ یەکێ دیسا ژی دخوازە کوردان بخاپینە و خوە وەکە پارتیەکە کوردستانی و رێبەرێ خوە ژی وەکە رێبەرەک کورد بدە باوەرکرن.
وەلاتپارێزی و نەتەویبوون نە تشتەکە ب دەرەوان وەرە ئیسپاتکرن، وەلاتپارێزی ب کار و هەلوەستا کەس و ئالیان ڤە گرێدایی یە، ت کەس و ئالیەک نکارە ئیخانەتێ بکە، د هەمان دەم دە ئیخانەتا خوە د بن پەردەیا دەرەوان دە ڤەشیرە، چ دبە بلا ببە دەرەو هەر تم وێ ئیفشا ببن، ئیرۆ ب پێڤاژۆیا کو د بن ناڤێ “پێڤاژۆیا چارەسەریێ یان ترکیەیا بێ تەرۆر” تێ مەشاندن دە، ئێدی روویێ راست یێ پەکەکێ کو دەربرینێ ژ خیانەتەک 52 سالی دکە پێتر ژ هەر دەمێ ئیفشا بوویە و ب دەرەوان نایێ ڤەشارتن.
د دەما ڤەگەرینا ئۆجالان بۆ ترکیەیێ د سالا 1999 دە، هێژان دەما د بالەفرێ دە راگهاند، “دایکا من ژی ترکە، گەر دەرفەت ب من وەرە دایین ئەزێ خزمەتا دەولەتا خوە “ترکیەیێ” بکم و هتد”، هەر وەها دەما ڤیدەئۆیێن ئۆجالان یێن ل ئیمرالیێ کو ب ئاوایەکی نهێنی ژ ئالیێ بەرپرسەکی میتێ ڤە هاتبوو کشاندن دەما دگۆ، “ئالیکاریا من بکن ژ بۆی کو هەولێرێ داگیر بکن، بارزانی دخوازە ئیسرائیلەکە دویەمین ل ناڤچەیێ ئاڤا بکە و هتد..” هاتین پارڤەکرن، وێ دەمێ پەکەکێ پرۆپاگاندایەک وسا پارڤەکر کو ئەڤ ڤیدەئۆ مۆنتاژن و ئۆجالان تشتەک ب ڤی ئاوا نەگۆتیە، وێ دەمێ گەر کەسەک هەبوویا باوەر ژ ڤێ پرۆپاگاندایا پەکەکێ بکە پر ئەجێب نەبوو، لێ تو د سالا 2025 دا ژیان بکی و هەیانی نها نەکاری دەرەوان ژ راستیان جودا بکی و پەکەکە بکارە د ڤێ دەمێ دە ژی ب دەرەو و ئیفترایان مەژیکێ تە شوولی بکە و تشتێ کو دخوازە ب تە بدە باوەرکرن، ب راستی ژی پر سەیرە.
ب دەستپێکرنا ڤێ پێڤاژۆیێ، ئۆجالان چەندین جاران داخویانی دان، هەیانی نها ژی بەرپرس و رایەدارێن دەم پارتیێ و پەکەکێ ژی دبێژن، ئەم لگۆر داخویانی و بریارێن رێبەر ئۆجالان تەڤ دگەرن، لێ دیسا ژی پەکەکە دخوازە کوردان بخاپینە و ب هندەک دەرەوێن د سۆسیال مەدیایێ دە دیسا ئیخانەتا خوە و رێبەرێ خوە ڤەشێرە.
دڤێت کورد ژ ڤان دەرەو و لیستکێن قرێژ یێن پەکەکێ رە ببێژن، ئێدی بەسە، هەیانی ڤڕ و نەما ئێدی ئەم باوەر ژ ڤان دەرەوێن وە بکن. دڤێت کورد ئێدی باوەر ژ پەکەکێ نەکن و هەر کەس باوەر بکە کو پەکەکە نە پارتیەکە کوردستانی یە و ژ بۆی وەنداکرنا کوردان ژ ئالیێ دەولەتا ترک ڤە هاتیە دامەزراندن.
بەلێ، پەکەکێ بریار ستەندیە دەست ژ چەکان بەردە، لێ ت جاری پەکەکە نکارە دەست ژ چەکێ خوە یێ بنگەهین ئانکو “دەرەو، ئیفتیرا و بێبەختیێ…” بەردە، ژ بەر کو ل سەر ئەساسێ دەرەوان هاتیە دامەزراندن، و وەکە باب و کالێن کوردان دگۆ، “گیا ل سەر بنێ خوە شین دبە”، رەهوریشالێن پەکەکێ ژی دەرەون، لۆما هەرتم ل سەر دەرەوان ژیان دکە.
