ترکیە پشتراست دکە کو ئەوێ ئۆپەراسیۆنێن خوەیێن لەشکەری ل دژی پارتیا کارکەرێن کوردستانێ (په‌كه‌كێ) بدۆمینە، تەڤی کو وێ راگهاندیە کو پەڤچوونێن وێ یێن ب ده‌وله‌تا ترك ره ب داوی بوونە.
پشتی کو رێخستنا په‌كه‌كێ رۆژا دوشەمێ یا بۆری 12 گولانا 2025ێ هلوەشاندنا خوە و بداویهاتنا شەرێ خوەیێ ب دەهان سالان ب ترکیەیێ رە راگهاند، وەزارەتا پاراستنێ یا ترکیەیێ ئیرۆ رۆژا پێنجشەمێ 15 گولانێ بەرسڤ دا و پشتراست کر کو ئەوێ ئۆپەراسیۆنێن خوەیێن ل دژی رێخستنێ بدۆمینن.
وه‌زاره‌تێ گۆت كو هەتا کو هەرێم “پاقژ ببە” و “گەفا رێخستنێ وێ ژ هۆلێ رابە”، ئۆپه‌راسیۆنێن له‌شكری ب داوی نابن.
وەزارەتێ هەر وها پشتراست کر کو سازیێن دەولەتا ترکیێ ب رێیا مەکانیزمایەکە تایبەت ب وەلاتێن دن یێن هەرێمێ رە هەڤاهەنگیێ دکن دا کو چەکێن رێخستنێ رادەست بکن.
د داخویانیا وه‌زاره‌تێ ده وها هات گۆتن:
«گرینگە ئارتێش ئۆپەراسیۆنێن خوەیێن ل دژی ئەندامێن په‌كه‌كێ ل دەڤەرێن کو ئەندامێن په‌كه‌كێ لێ هەنە بدۆمینە هەتا کو پشتراست ببە کو ئەو دەڤەر “پاقژ” بوویە و ئێدی ژ بۆ ترکیەیێ گەفێ چێناکە».
بەردەڤکێ وەزارەتێ گۆت کو ئارتێش “وێ ب بریارداری ل دەڤەرێن کو ژ هێلا جوداخوازێن رێخستنا تەرۆریست ڤە هاتنە بکار ئانین ئۆپەراسیۆنێ بدۆمینە.”
ل گۆری ئاژانسا ئانادۆلویێ، وەزارەتێ زێدە کر کو سازیێن دەولەتێ دێ ب هەڤکارێن خوەیێن ل وەلاتێن هەرێمێ رە هەڤاهەنگیێ بکن دا کو مەکانیزمایەک هەڤاهەنگ ژ بۆ رادەستکرنا چەکێن پارتیێ ئاڤا بکن.
پارتیا کارکەرێن کوردستانێ کو ژ چار دەهسالان زێدەترە ب ترکیەیێ رە شه‌ره‌كی چه‌كداری یێ بێئه‌نجام دكه، رۆژا دوشەمێ یا بۆری 12 گولانا 2025ێ هلوەشاندنا خوە و بداویئانینا شەرێ چەکداری راگهاند.
