بەردەڤکێ کەجەکێ: پەکەکێ بریارا دانینا چەکان نەدایە..!

بەردەڤکێ پێوەندیێن دەرڤە یێ کەجەکێ زاگرۆس ھیوا دبێژە: “پەکەکێ بریارا دانینا چەکان نەدایە.”

پەکەکێ 12 گولانێ بریارێن کۆنگرەیا 12ێ ئەشکەرە کرن و دا خویاکرن کو، وان بریارا دایە دەست ژ چەکان بەردن و ئێدی ب چ ئاوایی ل سەر ناڤێ پەکەکێ خەبات نەیێ کرن واتە بریارا هلوەشاندنا پەکەکێ دا.

پشتی ئەشکەرەکرنا بریارێن کۆنگرەیا پەکەکێ، گۆتوبێژان ل سەر ئاوایێ دەست ژێ بەردان چەکان و رادەستکرنا چەکان ھاتن کرن و مەدیا ترکی دە بەحسا رۆژ و قادێن کو چەکدارێن پەکەکێ چەکێن خوە د بن چاڤدێریا رایادارێن ترکیە دە رادەست بکن ھاتە کرن.

بەردەڤکێ پێوەندیێن دەرڤە یێ کەجەکێ زاگرۆس ھیوا ل سەر مژارێ ژ بۆ ستێرک تڤیێ ئاخڤی.

“کەسی بەحسا دانین و رادەستکرنا چەکان نەکریە”

زاگرۆس ھیوا گۆت کو د کۆنگرەیا پەکەکێ دە بریارا داوی ئانینا شەرێ چەکداری ھاتیە دایین، نە بریارا دانینا چەکان ھاتیە دانین. نە.

ھین پێڤاژۆیا ب ناڤێ ئاشتیێ دەست پێ نەکریە چمکی ھەر دو ئالی ل سەر ناڤێ پێڤاژۆیێ ل ھەڤ ناکن.”

زاگرۆس ھیوا ل سەر مژارێ گۆت: “هێژ شکەفت و تونێلێن بەرخوەدانێ ل زاپ و مەتینایێ ژ ئالیێ پەدەکێ و دەولەتا ترکیەیێ ڤە ھاتنە دۆرپێچکرن.

ناڤبەرا ھێزێن گەریلا و لەشکەرێن داگیرکەرێن ترک 50 مەتر، 100 مەترن. د رەوشەکا وھا دە چاوا دبە کو مرۆڤ چەکان دەینە؟

بەری کو بەحسا دانینا چەکان بهێت کرن، پێویستە ل سەر ڤەکشینا ئارتێشا داگیرکەرا ترک ژ ئاخا باشوورێ کوردستانێ وەرە ئاخافتن.

هێژ زوویە کو مرۆڤ ڤێ رەوشێ وەکی پێڤاژۆیەکێ پێناسە بکە.

رێبەر ئاپۆ دەستپێکرنا ڤێ دەمێ راگھاندیە و ژ بۆ کو ھەر پێڤاژۆیەکا د چارچۆڤەیا ڤێ دەمێ دە پێش بکەڤە، دڤێت پێشی رێبەر ئاپۆ د وارێ فیزیکی دە ئازاد ببە.

ئەگەر ب راستی دەولەتا ترکیەیێ ئاشتیێ دخوازە، پێویستە کو ئەو ژی رەژیما تەجرید و ئیشکەنجەیا ئیمرالیێ ب تەڤاھی راکە.”