پارتیا دەمۆکراتا کوردستانێ – سووریا (پەدەکە-سە) و پارتیا پێشڤەروویا دەمۆکراتا کوردی ل سووریێ ھەڤتێگھشتنەک ژ بۆ بھێزکرنا کارێ ھەڤبەش ب ئارمانجا خورتکرنا کارێ ھەڤبەش د ناڤبەرا ھەر دو ئالیان دە ئیمزە کرن.
مالپەرا پەدەکە-سێ بەلاڤ کر، د ھەڤدیتنەکا فەرمی دە د ناڤبەرا سکێرتەرێ پەدەکە-سێ محەمەد ئیسماعیل و سەکرەتەرێ پارتیا پێشڤەروویا دەمۆکراتا کوردی ل سووریێ در. سەلاح دەرویش، ل باژارێ قامشلۆ، دوھ 17 گولانێ ھەڤتێگھشتن ھات ئیمزەکرن.
د ھەڤتێگھیشتنێ دە، بەحسا رەوشا ھەستیارا سووریەیێ تێ کرن، “پشتی کو 14 سال د سەر دەستپێکرنا شۆرەشا گەلێ سووریەیێ یا ل دژی رەژیما ستەمکار و دیکتاتۆری و رووخاندنا وێ رەژیمێ رە دەرباس بوونە. گەلێ کورد و تەڤگەرا سیاسی یا کوردی ئیرۆ لگەل کێشەیێن نوو رووبروو نە کو ژ کێشەیێن سەردەما بەرێ نە کێمترن. ژ بەر ڤێ یەکێ، گوھەرتنێن ل قادا سووریەیێ و ناڤچەیێ ھەوجە دکن کو ھەر دو پارتیێن ھەڤپەیمان ب ھەڤ رە بخەبتن ژ بۆ خزمەتا دۆزا کوردی.
ل گۆری ھەڤتێگھیشتنێ، ھەر دو ئالی ل سەر ڤان خالێن ژێرین ل ھەڤ کرنە کو ببن دەستپێکەک بەر ب ئاڤاکرنا شریکاتیەکە پراتیکی ژ بۆ خزمەتا دۆزا گەلێ کورد ل سووریەیێ و دەمۆکراسیێ ل سووریێ:
1- ئاڤاکرنا کۆمیتەیەکا پێوەندی و ھەڤرێزیێ د ناڤبەرا ھەر دو ئالیان دە، کو ژ دو ئەندامێن ھەر پارتیێ پێک تێ.
2- خەباتا ل سەر ھەڤرێزکرنا نێرین و سیاسەتان و شێورینا د ناڤبەرا ھەر دو پارتیان دە.
3- وەک دو پارتیێن ھەڤپەیمان ل قادێن جودایێن ھەبوونا خوە کار بکن، ژ بۆ ئافراندنا زەمینەکا ھەڤبەش ژ بۆ ھەڤالێن خوە ژ بۆ خەباتا ھەڤبەش ل سەر ئاستا رێخستنان.
4- ب ھەڤ رە ل سەر قادا نشتمانی یا سووریێ کار بکن، ئەزموونان پارڤە بکن و لگەل ھێزێن سیاسی یێن دەمۆکراتیک شریکاتیان ئاڤا بکن.
5- د مژارێن سیاسی دە نێرین و ھەلوەستێن ھەڤبەش وەربگرن.
6- د رەوشێن ئاوارتە دە کو ھەوجە بکە، ھەر پارتیەک پشتگری، ئالیکاری و ھەڤکاریێ پێشکێشی پارتیا دن بکە.
ئەڤ پێنگاڤ وەک ھەولدانەک ژ بۆ یەکرێزیا کوردی و خورتکرنا پێگەھا کوردان د قادا سیاسی یا سووریەیێ یا پاشەرۆژێ دە تێ دیتن.
