سەرۆکێ ھەرێما کوردستانێ، نێچیرڤان بارزانی ئیرۆ 18ێ گولانێ د پانەلەکا کۆربەندا دیالۆگا تەھرانێ دە، رەخنە ل جیبجینەکرنا سیستەما فەدەرالی یا ئیراقێ گرت و گۆت: “ئەگەر دەستوورا هەمیشەیی یا ئیراقێ وەکی خوە بێ جیبجیکرن، بێگومان پرانیا کێشە و ئالۆزیێن د ناڤبەرا ھەرێما کوردستانێ و ئیراقێ دە دێ چارەسەر ببن.”
پێشکێشکارێ پانەلێ ناسر کەنعانی، بەردەڤکێ بەرێ یێ وەزارەتا دەرڤەیا ئیرانێ بوو. د بەرسڤا پرسا کەنعانی یا دەربارێ پێناسەکرنا ھەرێما کوردستانێ و ئیراقا پشتی 2003 دە، سەرۆکێ ھەرێما کوردستانێ گۆت: “بەریا کو ئامەریکی د سالا 2003 دە وەرن ئیراقێ، ھەرێما کوردستانێ ھەر ھەبوو. وێ دەمێ ئامەریکیان داخواز ژ مە کر کو ئیراق ببە وەلاتەکی دەمۆکراتیک و فەدەرالی. مە ژی د رووخاندنا رەژیما سەدام حوسێن دە ئالیکاریا وان کر. ژ بەر ڤێ یەکێ، ل ئیراقێ سیستەما دەولەتداریێ وسا ھاتیە پێناسەکرن کو فەدەرالی بە. لێ مخابن ھەتا نھا ئەم نەگھیشتنە ڤێ سیستەمێ، ژ بەر کو ئیراق ھێژ پر دووری سیستەما فەدەرالییە. نھا ژی نیقاش و گوفتووگۆیێن مە ل ھەرێما کوردستانێ لگەل ئیراقێ ھەر ل سەر سیستەما فەدەرالی نە.”
نێچیرڤان بارزانی ھەروھا تەکەز کر: “ئەم باوەر دکن کو ئەم ھەموو د ناڤ سینۆرەکی جۆگرافی دە دژین، ب ناڤێ ئیراقێ. ژ بەر ڤێ یەکێ، دڤێت سیستەمەک بێ شۆپاندن کو جھێ رازیبوونا ھەموو پێکھاتەیان بە. شێوازا سیستەمێ ژی د دەستوورا ئیراقێ دە ھاتیە بجیکرن و 80%ێ گەلێ ئیراقێ دەنگێ خوە دایێ. ژ بەر ڤێ یەکێ، ئەم ل ھەرێما کوردستانێ د وێ باوەریێ دە نە کو ئەگەر دەستوورا هەمیشەیی یا ئیراقێ وەکی خوە بهێت جیبجیکرن، ئەوێ بێگومان پرانیا وان گرێکێن کو د ناڤبەرا ھەرێما کوردستانێ و ئیراقێ دە ھەنە، ڤەبن. لێ راستیا نھا یا ئیراقێ زەلال و ئەشکەرەیە کو شێوازا سەرەدەریا وێ لگەل ھەرێما کوردستانێ، نە د چارچۆڤەیا حکوومەتەکا فەدەرالی دەیە.”
د بەردەوامیا ئاخافتنا خوە دە، نێچیرڤان بارزانی دا زانین: “گەلەک جاران مە ژ بەرپرسێن ئیراقێ رە گۆتیە، پێویستە ژ بۆ چارەسەرکرنا کێشە و ناکۆکیان، ئەم راستەراست و ئەشکەرە گوفتووگۆیێ بکن و بزانبن ئەم ل سەر کیژان خالێ ھەڤنێرینن و دکارن ل ھەڤ بکن. رێزدار عادل عەبدولمەھدی ب خوە، سەرۆکوەزیرێ بەرێ یێ ئیراقێ شاھدە، کو نھا ل ڤر روونشتیە. ژ بەر ڤێ یەکێ، ئەگەر ئیراق بخوازە پرسا سیستەما فەدەرالی چارەسەر بکە، دڤێ لگەل ھەرێما کوردستانێ گوفتووگۆیێ بکە.”
سەرۆکێ ھەرێما کوردستانێ نێچیرڤان بارزانی دوھ 17ێ گولانێ گھشتبوو تەھرانێ، پایتەختا ئیرانێ و ژ ئالیێ سەیید مووسا عەلیزادە تەباتەبایی، بەرپرسێ بەشا کەنداڤا فارسی و ئیراقێ ل وەزارەتا دەرڤەیا ئیرانێ ڤە ھاتبوو پێشوازیکرن.
سەرۆکێ ھەرێما کوردستانێ، د دەما مانا خوە دە دێ لگەل ھەژمارەک بەرپرسێن ئیرانێ، ب تایبەتی لگەل سەرۆککۆمارێ ئیرانێ مەسعوود پزشکیان ھەڤدیتن و شێوران بکە.
کۆربەندا دیالۆگا تەھرانێ رۆژێن 18 و 19 گولانێ، ل ناڤەندا لێکۆلینێن ناڤدەولەتی یا وەزارەتا دەرڤەیا ئیرانێ ب بەشداریا مێڤان و شاندەیێن ژ 53 وەلاتان برێڤە دچە.
