سەرۆکێ مه‌هه‌پێ دەولەت باخچەلی راگهاند دڤێ ژ بۆ پێڤاژۆیا نوو یا ل ترکیە و باکورێ کوردستانێ ل پارلامەنتۆیێ کۆمیسیۆنەک بێ ئاڤاکرن.
سەرۆکێ مه‌هه‌پێ دەڤلەت باهچەلی ژ بۆ بپێشخستنا پێڤاژۆیا چارەسەریێ داخوازا ئاڤاکرنا کۆمیسیۆنەکە ب بەشداریا نوونەرێن 16 پارتیێن ل پارلامەتۆیێ کر و وی 7 خال ژی پێشنیار کرن.
دەڤلەت باهچەلی گۆت کو بلا ژ نوونەرێن هەموو پارتیان 100 ئەندامێن کۆمیسیۆنێ هەبن و وها دۆماند:
«گەشەدانێن ل سەر هەڤیێن کو ب بانگا 27ێ سباتێ یا ئیمرالیێ قالکێ خوە شکاند، 10ێ ئادارێ په‌یه‌دێ/یه‌په‌گێ ب رێکەفتنەکە تێگهشتنێ قەبوول کر کو چەکێن خوە رادەستی کۆمارا ئەرەبی یا سووریەیێ بکە و تەڤلی سازیێن رێڤەبەریا نوو ببە و 12ێ گولانێ بریارا په‌كه‌كێ یا چەکدانینێ و خوەفەسخکرنێ، ژ بۆ ترکیە و وەلاتێن هەرێمێ گاڤێن پر ب خێرن».
7 خالێن کو باخچەلێ پێشنیار کرن وهانە:
«-د سەری دە، ژ بۆ خەباتێن کۆمیسیۆنێ ب ئاوایەکی بەرفرەهـ و شەفاف بێن مەشاندن، دڤێ کۆمیسیۆن ژ 100 ئەندامێن نوونەرێن 16 پارتیێن سیاسی یێن ل پارلامەنتۆیێ تێن تەمسیلکرن پێک بێ و ل گۆری شەرت و مەرجێن خەباتێ کۆمیسیۆن بێن ئاڤاکرن.
-دویەم، دڤێ هەر پارتیەکە سیاسی یا کو ل پارلامەتۆیێ نوونەرێن وێ هەنە ب کێمانی ب ئەندامەکی وەرە تەمسیلکرن و ئەندامێن دن ل گۆری رێژەیا تەمسیلا پارتیێن کو کۆمێن وان هەنە بێن دیارکرن.
-سێیەم، دڤێ هەر پارتیەکە سیاسی یا کو ل پارلامەنتۆیێ تێ تەمسیلکرن، کاربە دو پسپۆرێن د وارێ خوە دە ژ بۆ خەباتا کۆمیسیۆنێ دەستنیشان بکە.
-چارەم، دڤێ کۆمیسیۆن رێ و رێبازێن خەباتێ ب خوە دیار بکە.
-پێنجەم، دڤێ سەرۆکێ پارلامەنتۆیێ سەرۆکاتیا کۆمیسیۆنێ بکە.
-شەشەم، دڤێ بریار د کۆمیسیۆنێ دە ب پرانیا دەنگان بێن وەرگرتن.
-هەفتەمین ژی دڤێ بریارێن کو د کۆمیسیۆنێ دە تێن وەرگرتن، ژ ئالیێ پارلامەنتەران وەکی پێشنیارنامە بێنە ئامادەکرن و ژ کۆمیسیۆنێن پسپۆرێن تێکلدار و لژنەیا گشتی یا پارلامەنتۆیێ رە بێن پێشکێشکرن».
