ل ئامەریکایێ، ب ئامادەبوون و سەرپەرشتیا سەرۆکوەزیرێ هەرێما کوردستانێ مەسروور بارزانی، دو پەیمانێن گرینگێن د وارێ ئەنەرژیێ دە د ناڤبەرا وەزارەتا سامانێن سروشتی یا حکوومەتا هەرێما کوردستانێ و کۆمپانیایێن ئامەریکی یێن HKN ئەنەرجی و وێسترن زاگرۆس دە هاتن ئیمزەکرن. هات راگهاندن کو نرخێ گشتییێ ڤان پەیمانان دگهیژە 110 ملیار دۆلاران و تێ چاڤەرێکرن کو باندۆرەکە ئەرێنی ل سەر پێشخستنا سەکتۆرا ئەنەرژیێ و بنەسازیا ئابۆری یا هەرێمێ بکن.
د چارچۆڤەیا سەردانا خوە یا ژ بۆ ئامەریکایێ دە، سەرۆکوەزیرێ هەرێما کوردستانێ مەسروور بارزانی سەرپەرشتیا مەراسیما ئیمزەکرنا دو پەیمانێن ستراتەژیکێن د سەکتۆرا ئەنەرژیێ دە کر. پەیمان د ناڤبەرا وەزارەتا سامانێن سروشتی یا حكومه‌تا هه‌رێما كوردستانێ و هەردو کۆمپانیایێن ناڤدارێن ئامەریکی، HKN ئه‌نه‌رژی و وێسترن زاگرۆس دە هاتن مۆرکرن.
پێشوازی و نرخاندنا رۆلێ سەرۆکوەزیر مەسروور بارزانی
جیگرێ سەرۆکێ ئۆدەیا بازرگانیێ یا ئامەریکایێ، ستیڤ لوتەس، د دەما ئیمزەکرنا پەیمانان دە، پێشی ل سەرۆکوەزیر مەسروور بارزانی و شاندا پێ رە کر و گۆت: “جهێ کێفخوەشیێیە کو ئەم ب خێرهاتنا سەرۆکوەزیر مەسروور بارزانی و شاندا ل گەل وی دکن بۆ ئامەریکایێ.”
لوتەس هەروها دا زانین کو سەرۆکوەزیر بارزانی پێوەندیێن هەرێما کوردستانێ و ئامەریکایێ بهێزتر و بەرفرەهتر کرنە و گۆت: “پێوەندیەکە مە یا گەلەک باش و بهێز ب سەرۆکوەزیر مەسروور بارزانی رە هەیە. سەرکێشیا وی پێوەندیێن بازرگانی باشتر کریە.” جیگرێ سەرۆکێ ئۆدەیا بازرگانیێ یا ئامەریکایێ دەستنیشان کر کو سەرۆکوەزیر بارزانی “رۆلەکە سەرکێشی یا باش و حەکیمانە لیستیە” و سەردانا وی یا بەرێ یا ب شاندەکە بهێز بۆ واشنتۆنێ ژی وەکە گاڤەکە گرینگ د بهێزکرنا پێوەندیان دە ب ناڤ کر.
ستیڤ لوتەس تەکەز کر کو ئەڤ پەیمانێن هاتنە ئیمزەکرن “دو پەیمانێن بهێزێن ئەنەرژیێنە کو هەڤکاریا ستراتەژیکا د ناڤبەرا ئامەریکا و هەرێما کوردستانێ دە نیشان ددن” و راگهاند کو “نرخێ گشتییێ ڤان هەردو پەیمانان دگهیژە 110 ملیار دۆلاری.”
داخویانیێن نوونەرێن کۆمپانیان
رۆسس پەرۆت ژر.، خوەدیێ کۆمپانیا هۆلیوود (کو HKN ئەنەرژی بەشەک ژێیە)، پشتی ئیمزەکرنێ کێفخوەشیا خوە ئانی زمان و گۆت: “جهێ شانازیێیە کو ئەزموونا مە یا 18 سالان ب هەرێما کوردستانێ رە هەیە.”
هەروها دیار کر کو ئەو شانازن کار و بازرگانیا خوە ل هەرێما کوردستانێ پێش بخن و بەرفرەهتر بکن و هێڤی کر کو ئەڤ پەیمان ژ بۆ کۆمپانیا وان و هەرێما کوردستانێ ببە دەستپێکا پاشەرۆژەکە باشتر.
ژ ئالیێ خوە ڤە، نوونەرێ کۆمپانیا وێسترن زاگرۆس، ئەرج ستۆئەڕ، ژی ئەڤ پەیمان وەک “شەرەفەکە مەزن” ب ناڤ کر و گۆت کو ئەڤ دەرفەتەکە ژ بۆ بهێزکرن و بەرفرەهکرنا هەڤکاریا وان.
ستۆئەڕ دا زانین کو “ئەڤ پەیمان د بن سەرپەرەشتیا سەرۆکوەزیر مەسروور بارزانی دە، دێ رێ بدە مە کو ئەم کارێن خوە زێدەتر پێش بخن و بەرفرەهتر بکن.” وی دەستنیشان کر کو ئەو ژ سالا 2007ان ڤە ل هەرێما کوردستانێ کار دکن و ب ئەزموونا خوە یا دەمدرێژ ل هەرێمێ سەربلندن. ستۆئەڕ هەروها پێشبینی کر کو “پێشخستنا سەکتۆرا ئەنەرژی و گازێ ل هەرێما کوردستانێ دێ ببە مۆدەلەک ئامەریکی د وارێ ئەنەرژیێ دە.”
ئەڤ پەیمان وەکە گاڤەکە گرینگ ژ بۆ پێشخستنا سەکتۆرا ئەنەرژیێ و بهێزکرنا ئابۆریا هەرێما کوردستانێ تێن دیتن و هەروها پێوەندیێن ستراتەژیکێن د ناڤبەرا هەرێما کوردستانێ و ئامەریکایێ دە خورتتر دکن.
