پەکەکە داخوازا سڤککرنا تەجریدا ل سەر ئۆجالان دکە

پەکەکە داخوازا سڤککرنا تەجریدا ل سەر ئۆجالان دکە و دبێژە، “حکوومەتا ترکیەیێ ژ بۆ پێڤاژۆیەکا نوویا ئاشتیێ هیچ گاڤەک نەهاڤێتیە.”

بەردەڤکێ باسکێ سیاسی یێ پارتیا کارکەرێن کوردستانێ (پەکەکێ) زاگرۆس ھیوا ئیرۆ سێشەمبێ، 20ی گولانا 2025ێ، ھەلوەستا نوو یا پارتیا خوە ل سەر پێڤاژۆیا ئاشتیێ یا نوو ل ترکیە و باکورێ کوردستانێ و قۆناغا پشتی کۆنگرەیا 12 راگەھاند.

بەردەڤکێ باسکێ سیاسی یێ پەکەکێ ژ بۆ ئاژانسا AFP یا نووچەیان یا فرانسایی ئاخفتیە، رەخنە ل حکوومەتا ترکیەیێ گرت و گۆت، “ژ بۆ پێکانینا پێڤاژۆیەکا نوو یا ئاشتیێ هیچ گاڤەک نەهاڤێتیە.”

زاگرۆس ھیوا بانگ ل حکوومەتا ترکیەیێ کر کو، تەجریدا تاکەکەسی یا ل سەر رێبەرێ پەکەکێ یێ زیندانکری عەبدوللاھ ئۆجالان سڤک بکە و ئاماژە ژی دا کو، پەکەکێ باوەری نینە کو ترکیە پێڤاژۆیا ئاشتیێ ب جھ بینە، لەوما ژی رەد دکە کو پشتی چەکدانانێ ھێزێن خوە ژ باکورێ کوردستانێ و ترکیەیێ ڤەکشینە.

ناڤبری ھەروەسا گۆت، “عەبدوللاھ ئۆجالان لگەل حکوومەتا ترکیەیێ ژ بۆ پێڤاژۆیەکا نوو یا ئاشتیێ دانوستاندنان بەردەوام دکە.” ھەروەسا گۆت، “ئاشتیا راستین پێدڤی ھەڤگرتنێیە، نە ڤەقەتیانێ.” ئاماژە ژی دا، “ئەگەر ترکیە ل سەر پێڤاژۆیا ئاشتیێ دلسۆز و جدی بە، دڤێت گوھەرتنێن پێدڤی یێن قانوونی بکە دا کو ئەندامێن پەکەکێ لگەل جڤاکی ھەڤ بگرن.”

پارتیا کارکەرێن کوردستانێ (پەکەکێ) ل رۆژا دوشەمبێ 12/5/2025ێ، د راگەھاندنەکێ دە ئەنجامێ کۆنگرەیا خوەیا 12ێ راگەھاند، کو د ناڤبەرا 5 ھەتا 7ێ ڤێ مەھێ دە ل ژێر رۆناھیا بانگا رێبەرێ پارتیا کارکەرێن کوردستانێ یێ زیندانکری عەبدوللاھ ئۆجالان ھات لدارخستن. پەکەکێ د وێ کۆنگرەیێ دە بریارا خوەھلوەشاندنێ و بداویانین خەباتا چەکداریێ دا.