سەرۆکێ ناڤەندا لێکۆلینا ستراتەژیک یا بنگەهین، عەبدولرەحیم سەماوی، کۆنگرەیا 12ەمین یا پەکەکێ شیرۆڤە کر، سەماوی د سالا 2013 و 2015 دە د ناڤا هەیئەتا زلامێن عاقلمەند یێن ترکیەیێ دە جی گرتبوو، ئەو وەکە پسپۆرەکی ل سەر مژارا پەکەکێ تێ ناسکرن، هەمان دەمێ ئەو ل سەر تێکلیێن پەکەکێ و ترکیەیێ خوەدی گەلەک ئاگاهیانە. وی هەیانی نها گەلەک ئاگاهیێن راست ئەشکەرە کرنە، سەماوی دوهی ئێڤاری تەڤلی بەرنامەیا خانی تیڤی بوو و ئەڤ ئیدیعایە کر کو ئۆجالان راستەوخۆ کۆنگرەیا پەکەکێ برێڤە بریە.
ئۆجالان کۆنگرە د ئاڤاهیا میتێ دە برێڤەبریە
عەبدولرەحیم سەماوی گۆت، ئۆجالان لگەل دەولەتا ترک تەڤ دگەرە و گەلەک نەرینێن بالکێش دان. ژ نەرینێن وی ئەم چەند خالان باس دکن، “ئۆجالان ل ئانکارایێ د ئاڤاهیا میتێ دە کۆنگرەیا پەکەکێ شەخسەن ئۆرگانیزە کریە و ب شێوەیەکی ئەکتیڤ د کۆنگرەیێ دە ئامادە بوویە، بریارا هلوەشاندنا پەکەکێ، ژ بۆی هەموو رێخستنێن پەکەکێ یە، رێخستنێن وێ یێن ئەورۆپا، پژاک و یێن رۆژئاڤا ژی د ناڤا ڤێ بریارێ دە جی دگرن. ئۆجالان سۆز دا دەولەتێ هەسەدە بێهێتە هلەشاندن و ل رۆژئاڤایێ کوردستانێ ژی ستاتویا هەیی ب داوی وەرە، پەکەکە چەکێن د دەستێن خوە دە د بن جاڤدێریا ئیستیخباراتا ترکیەیێ دە ل 6 خالێن جودا دێ تەسلیمی دەولەتێ بکە. ئۆجالان لیستەیا ڤان چەکان ئامادە کریە کا دێ چ چەک هێنە تەسلیمکرن.”
سەماوی هەمان دەمێ ل سەر داراییا پەکەکێ ژی ئاگاهیێن بالکێش دان و راگهاند، پەکەکە خوەدی 28 ملیار دۆلارانە، ئەڤ پەرە هەموو دێ تەسلیمی ئۆجالان هێن کرن و ئۆجالان گۆتیە، “ئەز دخوازم ب ڤی پەرە پشتگیریا ئابۆرییا ترکیەیێ بکم.” هەمان دەمێ عەبدولرەحیم سەماوی گۆت، ژ بۆی رێڤەبەرێن پەکەکێ ل سەر فۆرمۆلۆکێ نیقاش هاتیە کرن کو ژ دو قۆناغان پێک تێ، ل گۆر سەماوی هەیانی نها دو رێ هەنە، رێیا یەکەمین ئەڤە کو ئەندامێن رێخستنێ دەمەکێ دێ ل هەرێما کوردستانێ هێن بجیکرن، پشتی کو د دەستوورێ ترکیەیێ دە هندەک گوهەرین چێدبن، ئەو دێ چن ترکیەیێ، ل گۆر ئاگاهیێن عەبدولرەحیم سەماوی رێیا دویەمین ژی ئەڤە، ئەندامێن پەکەکێ دێ دەستپێکێ چن ترکیەیێ، ئەو دێ دەمەکێ د زیندانا مالێ دە هێن گرتن، پشتی لێکۆلینا وان خەلاس بوو و دەستوور ژی هات گوهەرتن دێ هێنە ئازادکرن.
عەبدولرەحیم سەماوی کەسەکە کو ژ دەستپێکا ڤێ پێڤاژۆیێ ل سەر ئەکرانێن تەلەفزیۆنێ دەرکەت و گەلەک ئاگاهی دان و هەیانی نها ئەڤ ئاگاهیێن وی پرانی راست دەرکەتنە. ژ بەر ڤێ یەکێ ئەڤ داخویانیا ڤێ داویێ دایی گەلەکی دەنگڤەدا و نیقاشەکی مەزن چێکر.
