پارتیا کارکەرێن کوردستانێ، پشتی بریارا هه‌لوه‌شاندنا خوه راگهاندی رەد دکەت کو ئه‌و رازی ببیت شەرڤانێن وێ ژ ترکیەیێ بهێنه “نه‌فی” كرن.
رێخستنا په‌كه‌كێ 12 گولانا ئیسال د به‌رسڤا داخوازا ده‌وله‌ت باخچه‌لی دا و بانگا ئۆجالان یا 27 سباتێ، ئه‌نجامنامه‌یا كۆنگره‌یا خوه یا ئاوارته راگهاند و تێ دا 4 بریار هه‌بوون، یه‌ك ژێ هه‌لوه‌شاندنا رێخستنێ و به‌تالكرنا چالاكیێن سه‌ربازی ل دژی تركیه‌یێ.
پشتره هات راگه‌هاندن كو هنده‌ك ئه‌ندامێن رێخستنێ دێ بۆ وه‌لاتێن ئافریكا و ئه‌ورۆپایێ هێن نه‌فی كرن.
د به‌رسڤا ڤێ چه‌ندێ دا، به‌رده‌ڤكێ رێخستنا په‌كه‌كێ زاگرۆس هیوا ئاگاهی داینه ئاژانسا فرانس پرێسێ و راگهاند کو پشتی بریارا هه‌لوەشاندنێ، د چارچۆڤەیا هەر دانوستاندنه‌كا پاشه‌رۆژێ یا ده‌ربارێ ئاشتیێ دا، په‌كه‌كه ب چ ئاوایی رازی نابیت، ئه‌ندام و شه‌رڤانێن وێ بۆ ده‌رڤه‌ی تركیێ بهێنه “نه‌فی” كرن.
زاگرۆس هیوا گۆت: “ئاشتیا راستین پێویستی ب هه‌ڤدو ته‌مامكرنێ هه‌یه، نه‌ك “نه‌فی” كرن.
په‌یڤدارێ ب ناڤێ په‌كه‌كێ بۆ فرانس پرێسێ هه‌روه‌ها گوتیه: «ئه‌گەر دەولەتا ترکیێ ب راستی و ب جددی ئاشتیێ دخوازیت، دڤێت ئەو گوهارتنێن قانوونی یێن پێویست بکەت دا کو ئەندامێن په‌كه‌كێ د ناڤ جڤاکەکا دەمۆکراتیک دا تێكهه‌ل بکەت».
وی زێدە کر کو “نه‌فی” كرن ل گه‌ل ئاشتی و هەر چارەسەریەکا دەمۆکراتیک نە لهەڤهاتییە.
