ھەڤسەرۆکێ گشتی یێ پارتیا وەکھەڤی و دەمۆکراسیێ یا گەلان (دەم پارتی) تونجەر باکرھان دیار کر، ل پێشیا جیھانێ و ھەرێمێ دو رێیێن سەرەکی ھەنە: یان شەر و پەڤچوون، یان ژی ئاشتیەکا جیھانی و ھەرێمی. باکرھان تەکەز کر، ئەو وەک دەم پارتی دخوازین ئاشتی بسەر بکەڤە و پەیوەندیێن دیرۆکی یێن کورد و ترکان ل سەر زەمینەکا دەمۆکراتیک ژ نوو ڤە وەرن سازکرن.
دەم پارتی، ئیرۆ 25ێ گولانێ ل ناڤەندا کۆنگرەیێ یا چاندێ یا دیاربەکرێ ب درووشما “لگەل رێڤەبەریێن ھەرێمی یێن دەمۆکراتیک بەر ب جڤاکا دەمۆکراتیک ڤە” جڤینا ناڤبەرێ یا رێڤەبەریێن ھەرێمی یێن دەمۆکراتیک” ل دار خست. د جڤینێ دە ھەڤسەرۆکێ گشتی تونجەر باکرھان ئاخافتنەکا گرینگ کر.
“پەیوەندیێن دیرۆکی دکارن وەرن نووژەنکرن”
باکرھان د ئاخافتنا خوە دە بال کشاند سەر پەوەندیێن دیرۆکییێن کورد و ترکان و گۆت: “پێوەندیێن کورد و ترکان خوەدی رابردوویەکە کەڤنارن. پێوەندیێن دیرۆکی د رابردوویێ دە گەلەک ئاستەنگی دەرباس کرن، لێ د قۆناغێن ھەری گرینگ یێن دیرۆکێ دە، ترک و کوردان لگەل گەل و باوەریێن دن تفاق کرنە و ب ھەڤ را تەڤدگەریانە، زەمینەکا ئاشتیێ یا پر گرینگ و دەستکەفتیێن مەزن ب دەست خستنە. دبە کو پەیوەندیێن دیرۆکی یێن کورد و ترکان د سەدسالا بۆری دە ھاتبن خەرابکرن، ژ جەوھەرا خوە ھاتبن دوورخستن، دبە کو لاواز بووبن، لێ ژ نوو ڤە خورتکرنا ڤان، ل سەر زەمینەکا نوو و ب ئاوایەکی دەمۆکراتیک سەرەراستکرنا ڤان پێوەندیان، د بەرژەوەندیا مە ھەموویان دەیە، د بەرژەوەندیا ھەموو گەلێن ل ترکیەیێ دژین دەیە.”
“چارەسەری ل پارلامەنتۆیێ یە”
ھەڤسەرۆکێ دەم پارتیێ ئانی زمان کو جەوھەرا پرسگرێکا کورد نەبوونا لھەڤکرنەکا دوئالی و نەڤەگوھەراندنا ڤێ یەکێ بۆ دەقەکا یاسایا نڤیسکییە. باکرھان گۆت: “چارەسەریا پرسا کورد گرێدایی یاسا و بەلگەیێن مافناسییە. ژ بەر ڤێ ئەم دبێژین دڤێت ل پارلامەنتۆیێ ئەڤ پرسە وەرە چارەسەرکرن. ئاشتی تەنێ ب نیازپاکی و گۆتنێن خوەش نابە. دڤێت یاسایێن پێویست، ل سەر وەکھەڤی و براتی بێن دەرخستن. ئەڤ یەک ب پارلامەنتۆیێ دبە. ژ بەر کو ئاشتی و چارەسەری نە تەنێ جڤاکییە، د ھەمان دەمێ دە یاساییە ژی. زەمینا یاسایی دێ ژ ئالیێ مەجلیسێ ڤە بێ دابینکرن.”
