ھەڤسەرۆکا پارتیا وەکھەڤی و دەمۆکراسیا گەلان (دەم پارتی) تولای ھاتمۆغلاری د دەرحەقا پێڤاژۆیا ئاشتیێ ل ترکیەیێ و گاڤێن بسەرخستنا وێ دبێژە، “ئەرکا سەرەکی یا بەرقەرارکرنا ئاشتیێ ل سەر ملێ پارلامەنتۆیێ یە، لێ داخوازیا پێشیێ نە سەرەراستکرنا دەستوورا ترکیەیێ بەلکی بجھانینا سیستەما دەمۆکراتیکە.”
تولای ھاتمۆغلاری ژ ب بۆ مەدیایەکا نێزیکی پارتیا کارکەرێن کوردستانێ (پەکەکێ) ئاخفتیە و راگەھاندیە، “پێڤاژۆیا ئاشتیێ ژ جۆتمەھا پار ڤە دەست پێ کریە، یەک ژ گرینگترین دەرفەتێن ئاشتیێ یە د دیرۆکا 100 سالی یا ترکیەیێ دە.” ھەروەسا گۆتیە، “دڤێت بزاڤێن جدی ژ بۆ بسەرخستنا ڤێ پێڤاژۆ و دەرفەتێ بێن کرن.”
ھەڤسەرۆکا دەمپارتیێ رۆن ژی کر، “دەما کو دەرفەتەکا دیرۆکی یا وھا تێ پێش، ھەکە ئەم کار و بزاڤەکا جدی نەکن، ئاشتیەکا ھەردەمی پەیدا نابە.”
ئاماژە ژی دا، “ژ بۆ پێشڤەبرنا ڤێ پێڤاژۆیێ، ھندەک گاڤێن بەرچاڤ ھەنە کو دڤێت بێن ئاڤێتن. ئەم د ھەر دەرفەتەکێ دە تەکەزێ ل سەر گاڤان دکن و ئەم خەمساریێ د دوبارەکرنا وان دە ناکن ھەتا کو ئەو ب جھ تێن، د ناڤ دە ژی دڤێت ھەمی گرتیێن دۆزا کۆبانیێ، تەڤی سەلاحەدین دەمیرتاش، فیگەن یوکسەکداغ و یێن دن، سەربەست بێن بەردان.”
ھەروەسا بال کشاند سەر گوھەرتنێن د چەند یاسایان دە و گۆت، “دڤێت گوھەرتنەکا رادیکال د یاسایا بەرھنگاربوونا تەرۆرێ دە بێ کرن، ژ بەر کو مانا ب ڤی ئاوایێ نھا دبە سەدەما ئاستەنگیەکا مەزن ل پێشیا دەمۆکراسیێ.”
ھەڤسەرۆکا دەم پاتیێ بەحسا رۆلا ئاشتیێ یا ترکیەیێ ل دەڤەرێ کر و گۆت، “بێ گومان ئەو رۆلا نھا ترکیە د لھەڤھاتنا دەڤەرێ دە دلیزە گرینگە، لێ گرینگە کو ئەڤ گاڤ د چارچۆڤەیا دەولەتا ترکیەیێ دە لگەل گەلێ کوردێ کو ل وی وەلاتی دژیت بهێت ئاڤێتن و بجھانین، پاشتر ئاشتیەکا وەسا دکارە ل سووریەیێ ژی پێک بێ.
