هەڤسەرۆکا کۆنسەیا رێڤەبەرا كه‌جه‌كێ بەسێ هۆزات راگهاند، بریارێن کۆنگرەیا 12مین یا په‌كه‌كێ، کو د ناڤ دە هلوەشاندنا رێخستنێ و بداویکرنا تێکۆشینا چەکداری هەیە، ب تەنێ ب مسۆگەرکرنا ئازادیا فیزیکی یا رێبەرێ په‌كه‌كێ ئابدوڵاهـ ئۆجالان و پێکئانینا گاڤێن دەمۆکراتیک، دکارن بکەڤن پراكتیکێ.
بەسێ هۆزات، د بەشداریا خوە یا د بەرنامەیا تایبەتا تەلەڤیزیۆنا مەدیا هابەرێ دە، رەوشا سیاسی و بریارێن کۆنگرەیا په‌كه‌كێ نرخاند. هۆزات دا زانین کو کۆنگرەیا 12 مین یا په‌كه‌كێ، کو ل سەر بانگا ئابدوڵاهـ ئۆجالان د ناڤبەرا 5-7ێ گولانێ دە ل دار کەت و بریارا بنگەهین یا هلوەشاندنا په‌كه‌كێ و بداویکرنا دەما تێکۆشینا چەکداری گرتیە.
لێبەلێ، هۆزات دەستنیشان کر، بجهئانین و پراكتیکرنا ڤان بریاران راستەراست ب چەند مەرجێن بنگەهین ڤە گرێدایی یە. وێ گۆت: “رێڤەبرنا ڤێ پێڤاژۆیێ، یانی بجهئانین، پراكتیکرنا بریارا هلوەشاندن په‌كه‌كێ، راوەستاندنا تێکۆشینا چەکداری ژی تەنێ ب ئازادیا فیزیکی یا رێبەر ئاپۆ ڤە گرێدایییە. پێویستە رێبەر ئاپۆ ببە خوەدی شەرت و مەرجێن کار و ژیانا ئازاد، دا کو ب ڤی رەنگی رێبەر ئاپۆ ڤێ تێکۆشینێ بمەشینە”.
هەڤسەرۆکا کۆنسەیا رێڤەبەرا كه‌جه‌كێ هەروه‌ها بال کشاند سەر پێویستیا ناسکرنا مافێ سیاسەتا دەمۆکراتیک و ل سەر ڤێ بنگەهێ پێکئانینا گوهەرتنێن قانوونی و هقووقی و گۆت، “دڤێ دەستوورا بنگەهین یا دەمۆکراتیک، ئازادیپارێز و وەکهەڤیا گەلان مسۆگەر دکە، ناسنامەیا گەلێ کورد و گەلێن ل ترکیەیێ مسۆگەر دکە، بێ ئاڤاکرن”.
بەسێ هۆزات ئانی زمان، هەتا ئەڤ مەرج – ئازادیا فیزیکی یا ئۆجالان، مسۆگەرکرنا مافێ سیاسەتا دەمۆکراتیک و سەرەراستکرنێن قانوونی و دەستووری – پێک نەیێن، “بجهانینا بریارا هلوەشاندنا په‌كه‌كێ و بداویکرنا تێکۆشینا چەکداری نەپێکانە.”
دەربارێ هەلوەستا دەولەتا ترکیەیێ دە، هۆزات رەخنە ل نێزیکاتیا ئاكه‌پێ گرت و وەکە “بێ جدی” ب ناڤ کر.
بەسێ هۆزات جارەکە دن تەکەز کر: “ئەم ب شێنبەری دبێژن؛ تەنێ رێبەر ئاپۆ دکارە چەکێ ژ دەستێ شەرڤانان بستینە. ئەڤ یەک ژی تەنێ ب ئازادیا فیزیکی یا رێبەر ئاپۆ دبە.”
