ھەڤسەرۆکێن گشتی یێن پارتیا وەکھەڤی و دەمۆکراسیێ یا گەلان (دەم پارتی)، تولای ھاتیمۆغلار و تونجەر باکرھان، ئیرۆ 28ێ گولانێ، ل پارلامەنتۆیا ترکیەیێ لگەل شاندەیەکا پایەبلندا پارتیا داد و گەشەپێدانێ (ئاکەپێ) جڤیان. د رۆژەڤا سەرەکی یا ھەڤدیتنێ دە، نرخاندنا دەرفەتێن ژ بۆ پێڤاژۆیەکا نوو یا ئاشتیێ و چارەسەریا پرسگرێکا کورد ھەبوو.
د شاندەیا دەم پارتیێ دە لگەل ھەڤسەرۆکان، سەرۆکوەکیلێن کۆما دەم پارتیێ گولستان کلچ کۆچیگیت و ەزای تەمەلی ژی ئامادە بوون. شاندەیا دەم پارتیێ ژ ئالیێ سەرۆکوەکیلێ گشتی یێ ئاک پارتیێ ئەفکان ئالا، بەردەڤکێ ئاک پارتیێ عۆمەر چەلیک و سەرۆکوەکیلێن کۆما ئاک پارتیێ عەبدوللاھ گولەر و ئۆزلەم زەنگین ڤە ھات پێشوازیکرن. ئەڤ ھەڤدیتن وەکە گاڤەکا گرینگ د ناڤبەرا ھەردو پارتیان دە تێ دیتن.
ئەڤ ھەڤدیتن د چارچۆڤەیا ھەولدانێن دەم پارتیێ یێن ژ بۆ پێشخستنا دیالۆگێ و ڤەکرنا رێ ل بەر پێڤاژۆیەکا ئاشتیانە دە پێک تێ. بەریا ڤێ، شاندەیەکا دەم پارتیێ کو ژ پارلامەنتەرا وانێ پەرڤین بولدان و پارێزەرێ رێبەرێ پەکەکێ عەبدوللاھ ئۆجالان، فاییق ئۆزگور ئەرۆل پێک دھات، رۆژا 18ێ گولانا 2025 سەردانا گراڤا ئیمرالیێ کربوو و لگەل ئۆجالان ھەڤدیتنەک پێک ئانیبوو.
پشترە، د 19ێ گولانێ دە، دەم پارتیێ سەردانا پارتیا دەڤا و پارتیا سەعادەتێ ژی کربوو.
ھەروھا، د بەردەوامیا ڤان ھەولدانان دە، ھەڤسەرۆکێن دەم پارتیێ رۆژا سێشەمبێ، 27ێ گولانێ، سەردانا سەرۆکێ گشتی یێ پارتیا تەڤگەرا نەتەوەپەرەست (مەھەپێ) دەولەت باخچەلی ژی کربوون.
ئارمانجا گشتی یا ڤان سەردانان، گۆتووبێژکرنا دەرفەتێن پێڤاژۆیەکا نوو یا چارەسەریێ ل ترکیەیێ و باکورێ کوردستانێ، و ھەروھا نرخاندنا رەوشا سیاسی یا پشتی 12ەمین کۆنگرەیا پارتیا کارکەرێن کوردستانێ (پەکەکێ)یە.
