جڤینەکا گرینگ و بەرفرەھ یا ھێز و ئالیێن سیاسی یێن ھەرێما کوردستانێ ب سەرپەرەشتیا دەستەیا کارگێری یا پارتیا دەمۆکراتا کوردستانێ (پەدەکێ) ئیرۆ 31ێ گولانێ ل ھەولێرێ دەست پێ کر.
د جڤینێ دە رەوشا گشتی یا ھەیی یا ئیراق، ھەرێما کوردستانێ و ناڤچەیێ تێ گۆتووبێژکرن. ھەروھا تێ چاڤەرێکرن کو ھەلوەستا ئالیێن سیاسی یێن ھەرێما کوردستانێ ل ھەمبەر بریارا وەزارەتا دارایی یا ئیراقێ یا ژ بۆ نەخەرجکرنا ماف و شایستەیێن دارایی یێن ھەرێما کوردستانێ بێ راگھاندن.
ھن ژ بەشدارێن پایەبلندێن جڤینێ ئەڤن:
1. جیگرێ سەرۆکوەزیر و وەزیرێ دەرڤەیێ ئیراقێ فوئاد حوسێن
2. ئەندامێ مەکتەبا سیاسی یا یەکیتیا نشتمانی یا کوردستانێ (یەنەکێ) سالار لالە سەرحەد
3. ئەندامێ سەرکرداتیا یەنەکێ در. مەجید حەمەدەمین
4. سەرۆکێ پارتیا سۆسیال دەمۆکراتا کوردستانێ محەمەد حاجی مەحموود
5. رێکخەرێ باسکێ ‘کوردسات’ یێ تەڤگەرا گۆران دانا ئەحمەد مەجید
6. ئەندامێ مەکتەبا سیاسی یا بزاڤا ئیسلامی عەبدوللاھ وەرتی
7. سەکرەتەرێ پارتیا رەنجدەرێن کوردستانێ باپیر کامەلا
8. نوونەرێ بزاڤا پەیوەندیا ئیسلامی محەمەد بازیانی
9. نوونەرێن پارتیا چاکسازیا ترکمەن عەبدولقادر بازرگان و موونا قەھوەچی
10. سەکرەتەرێ پارتیا کۆمونیستا کوردستانێ کاوە مەھموود
11. ئەندامێ مەکتەبا سیاسی یا پارتیا زەحمەتکێشان بێکەس قادر
بریارا بەغدایێ و کارڤەدانێن ھەرێمێ
پشتی شاندنا لیستەیا مووچەیێن مەھا گولانێ یێن مووچەخورێن ھەرێما کوردستانێ ژ بۆ بەغدایێ، وەزیرا دارایی یا ئیراقێ تەیف سامی پێر (چارشەمبێ، 28ێ گولانا 2025ێ) د نامەیەکێ دە حکوومەتا ھەرێما کوردستانێ ھایدار کر کو، ئێدی ئەو نکارە ل سەر شاندنا مووچەیان بەردەوام بە. وێ ئەڤ یەک ب ھنجەتا کو ھەرێما کوردستانێ بەهرا خوە یا دیارکری ژ یاسایا بودجەیێ دەرباس کریە و ب پابەندبوونا ب بریارا دادگەھا فەدەرال و قانوونا بودجەیا گشتی ڤە گرێ دا.
پۆلیتبورۆیا پەدەکێ ژی دوھی 29ێ گولانێ ل ھەمبەر وێ بریارێ داخویانیەک دا و تێ دە گۆت: “ئەم رایا گشتی یا ئیراق و ھەرێما کوردستانێ ھایدار دکن کو حکوومەتا فەدەرال ل سەر بنپێکرنا مافێن دەستووری یێن ھەرێما کوردستانێ بەردەوامە. بنپێکرنا ھەری داوی ژی نڤیسارا دوھی یا وەزارەتا دارایی یە، کو ل دژی دەستوور و بنگەھێن پەیمانا پێکانینا حکوومەتێ و سیاسیکرنا قووتێ (دەبارا) خەلکێ یە.”
فراکسیۆنێن کوردستانی یێن جڤاتا نوونەرێن ئیراقێ ژی دوھی راگھاندنەک بەلاڤ کر و تێ دە وھا ھات گۆتن: “ئەم ژ بەر بریارا وەزارەتا دارایی یا فەدەرال و راوەستاندن، نەدان و نەشاندنا مووچەیێن فەرمانبەرێن ھەرێما کوردستانێ ماتمایی مانە.”
فراکسیۆنێن کوردستانی ھەروھا ئاماژە پێ کرن: “ب لبەرچاڤگرتنا رەوشا مرۆڤی و ئەو رەوشا دژوار یا کو فەرمانبەرێن حکوومەتا ھەرێما کوردستانێ ژ بەر سیاسەتێن وەزارەتا دارایی یا فەدەرال تووش بوونە و گھیشتیە ئاستا برچیکرنێ و شەرێ ژیارا وان یا رۆژانە، ئارمانجەکا سیاسی ل پشت ڤێ بریارێ ھەیە و بنپێکرنا دەستوورا ئیراقێیە، کو ل گۆر مادەیا 37/یەکەم پاراستنا رێز و روومەتا وەلاتیان بێی کو شەرت و مەرج چ بن گارانتی دکە.”
