رێخستنا په‌كه‌كێ كو بریارا هلوه‌شاندنا خوه و راگرتنا چالاكیێن له‌شكری دا یه، ده‌وله‌تا ترکیەیێ ب پاشگوهکرنا هەولدانێن ئاشتیێ تاوانبار دکە و دبێژه: ئێریش ل دژی باره‌گه‌هێن وان هێژان ژی ده‌وام دكن، ئاردۆگان ژی دبێژه: ئه‌م بگهیژن ئارمانجا خوه یا «تركیه‌یا بێ ته‌رۆر»!!.
رێخستنا په‌كه‌كێ د داخۆیانییا خوه یا هه‌ری داوین ده كو 29 گولانێ ل سه‌ر زارێ به‌رده‌ڤكێ خوه زاگرۆس هیوا پارڤه‌كربوو، ده‌وله‌تا ترکیەیێ ب پاشگوهکرنا دەستپێشخەریا هلوه‌شاندنا په‌كه‌كێ و بداویئانینا تێکۆشینا چەکداری تاوانبار کر.
زاگرۆس هیوا گۆت کو تەڤی نیقاشێن سیاسی و جڤاکی یێن دژوار ل ترکیەیێ ل سەر بریارێن په‌كه‌كێ، بەرتەک تەنێ د نیقاشێن تەئۆریک دە مانە، وی دەستنیشان کر کو «نەبوونا بەرسڤەک فەرمی، سیاسەتا بەردەواما ئینکار و پاشگوهکرنێ یا ئەنقەرێ نیشان ددە».
دەربارێ ئۆپەراسیۆنێن ترکیێ دە ژی دەستنیشان کر کو ترکیە ل باشوورێ كوردستانێ چالاکیێن لەشکەری ددۆمینە.
زاگرۆس هیوا هشیاری دا کو تێکچوونا پێڤاژۆیێ دێ شانسەک دیرۆکی ژ بۆ ئاشتیا ماییندە وندا بکە.
هه‌ر ئیرۆ 1 خه‌زیرانا 2025ێ تاییب ئاردۆگان سه‌رۆككۆمارێ تركیه‌یێ گۆت كو ئه‌و بگهیژن ئارمانجا خوه یا تركیه‌یا بێ ته‌رۆر و پشتره هه‌رێما بێ ته‌رۆر!
د 12ێ گولانێ دە، په‌كه‌كێ هلوەشاندنا خوە راگهاند، کو ئەڤ یەک نیشانا بداویبوونا زێدەتری 40 سالێن شەرێ چەکداری یێ بێ ئه‌نجامێ په‌كه‌كێ یێ ب ترکیێ رە یە.
ئەڤ بریار د بەرسڤا بانگا مەها سباتێ یا دامەزرینەرێ په‌كه‌كێ، ئابدوڵاهـ ئۆجالان، دە هات، کو بانگ ل ئەندامان کر کو چەکێن خوە دەینن و رێخستنێ هلوەشینن. ئۆجالان ئه‌ڤ بانگ ل سه‌ر داخوازا ده‌وله‌ت باهچه‌لی راگهاند.
دگەل ڤێ یەکێ، وەزارەتا پاراستنێ یا ترکیێ د دەستپێکا ڤێ هەفتەیێ دە دیار کر کو ئۆپەراسیۆنێن لەشکەری ل دژی هێمانێن په‌كه‌كێ ل هه‌ر ده‌رێ دێ بەردەوام بکن، د هەمان دەمێ دە کو هەولدانێن بەردەوام ژ بۆ ئاڤاکرنا چارچۆڤەیەک هەڤبەش ژ بۆ بێچەککرنێ پشتراست دکە.
