کۆمیتەیا ناڤەندی یا پارتیا دەمۆکراتا کوردستانێ (په‌ده‌كێ) ئیرۆ 2ێ هەزیرانێ، ب سەرپەرەشتیا سەرۆک مەسعوود بارزانی و ب ئامادەبوونا ئەندامێن کۆمیتەیا ناڤەندی و بەرپرسێن لقان، جڤینا خوە یا بەرفرەهـ ل دار خست. د جڤینێ دە پێنج مژارێن سەرەکە هاتن گۆتووبێژکرن.
ل گۆری داخویانیا کو پشتی جڤینێ هات بەلاڤکرن، جڤین ب دەقەیەکە رێزگرتن ژ بۆ گیانێ پاکێ شەهیدێن کوردستانێ، سەرەوه‌رێ وان بارزانیێ نەمر و کاک ئدریسێ هەردەم د بیر دە، دەست پێ کر. پشترە چەند پرسێن گرینگ و رۆژانە هاتن شیرۆڤەکرن و گۆتووبێژ ل سەر هاتن کرن.
مژارێن سەرەکە یێن جڤینێ ئەڤ بوون:
پێوەندیێن ل گەل حکوومەتا فەدەرال:
هات تەکەزکرن کو په‌ده‌كێ د قۆناغا رووخاندنا رەژیمێ و ئاڤاکرنا ئیراقا نوو دە رۆلەکە ب باندۆر لیستیە، لێ مخابن بەشەک ژ دەستهلاتدارێن بەغدایێ ب زیهنیەتەکە دووری فەدەرالیزمێ و ب ئارمانجا ڤەگەراندنا دەولەتا ناڤەندی، پشت ل دەستوور و رێکەفتنان دکن و كارتا مووچە و بوودجەیا هەرێمێ وەک زەخت ب کار تینن.
جڤینێ پشتگری دا هەلوەستا پۆلیتبوورۆیێ دەربارێ مووچەیان و هەلوەستا پارتیێن کوردستانی د جڤینا 31ێ گولانێ دە بلند نرخاند، هەروها داخوازا چارەسەرکرنا کێشەیان و بداویئانینا ڤان رەفتارێن نەدادمەندانە کر.
پێوەندیێن ل گەل هێز و ئالیێن سیاسی یێن کوردستانێ:
په‌ده‌كێ باوەریا خوە یا ب پرپارتاتی و کارێ هەڤبەش و بەرپرسیاریا هەڤبەش ئانی زمان و بەحسا هەولدانێن خوە یێن ژ بۆ یەکرێزیا ناڤمالا کوردستانێ کر.
هات دەستنیشانکرن کو هەولدانێن ژ بۆ ئاڤاکرنا هەڤبەندیەکە کوردستانی ژ بۆ هلبژارتنێن داهاتوو یێن ئەنجوومەنا نوونەران یا ئیراقێ بێئەنجام مانە. دەربارێ جڤینا داوی یا هەڤبەشا پارتیێن کوردستانی یا ژ بۆ گۆتووبێژکرنا بریارا نەیاسایی یا وەزارەتا دارایی یا فەدەرال، هات گۆتن کو جڤینەکە باش و سەرکەفتی بوو، تەڤی کو هنەک ئالیان ڤەخوەندن قەبوول نەکربوون.
سەردان و جڤینێن سەرۆکێ حکوومەتا هەرێما کوردستانێ:
سەردانا سەرۆکوەزیرێ هەرێما کوردستانێ بۆ وەلاتێن یەکبوویییێن ئامەریکایێ و هەڤدیتنێن وی یێن لگەل کەسایەتی و دەزگەهێن وی وەلاتی، وەک کارەکی باش ژ بۆ زێدەتر بهێزکرنا پێوەندیێن د ناڤبەرا هەرێما کوردستانێ و ئامەریکایێ دە هات دیتن. هەروها، رێکەفتنێن ل سەر کێلگەهێن گاز و پەترۆلێ یێن د چارچۆڤەیا مافێن دەستووری و یاسایی یێن هەرێما کوردستانێ دە نە، ژ بۆ گەشەپێدانا ئابۆریا هەرێما کوردستان و ئیراقێ ب سوود هاتن زانین.
پرۆسەیا پێکانینا کابینەیا دەهەم یا حکوومەتا هەرێما کوردستانێ:
کۆمیتەیا دانووستاندنانا په‌ده‌كێ زانیاری و رۆنیکرنێن پێویست دەربارێ پێنگاڤێن ڤێ پرۆسەیێ دە پێشکێشی جڤینێ کرن. بەردەوامیا پێنگاڤێن کۆمیتەیا ناڤبۆری ب مەبەستا پێکئانینا کابینەیا دەهەم د زووترین دەم دە ب پێویست هات دیتن.
پرۆسەیا هلبژارتنا خولا شەشەما ئەنجوومەنا نوونەران یا ئیراقێ:
کۆمیتەیا بلندا سەرپەرەشتیا پرۆژەیا هلبژارتنان تەڤاهیا پێنگاڤ و ئامادەکاریێن کو هاتنە کرن و پلان و بەرنامەیا داهاتوو یا کۆمیتە و ئۆرگانێن په‌ده‌كێ دەربارێ ڤێ پرۆسەیێ دە پێشکێش کر. جڤینێ پلان و هەولدانێن کۆمیتەیا ناڤبۆری ل گۆری خشتەیا دەمی یا کو هاتیە دیارکرن پەسەند کرن.
