شێوەکارێ کورد قەرەنی جەمیل کۆچا داوی کر

 شێوەکارێ ناڤدارێ کورد قەرەنی جەمیل، ئیرۆ 3ێ هەزیرانێ ژ بەر نەخوەشیا پەنجەشێرێ ل باژارێ هەولێرێ کۆچا داوی کر.

قەرەنی جەمیل د سالا 1954ان دە ل باژارێ هەولێرێ ژدایک ببوو. ئەو وەکە رەوشەنبیرەکی مەزن، هونەرمەندەکی ژێهاتی و کەسایەتیەکی هەزکری و رێزدار دهات ناسکرن. تابلۆیێن قەرەنی جەمیل ب گشتی رەنگڤەدانا دیرۆک، چاند و خوەزایا کوردستانێ بوون.

هونەرمەندێ کۆچکری، د سالا 1977ان دە باوەرنامەیا دیپلۆمێ ژ پەیمانگەها هونەرێن جوانا بەغدایێ وەرگرتبوو. هەروها، د سالا 1984ان دە کورسەکە سالانە یا لیتۆگرافیێ ل بارسەلۆنا یا سپانیایێ تەمام کربوو.

یەکەمین پێشانگەها خوە یا تایبەت د سالا 1977ان دە ل هۆلا دبستانا ئەیووبیێ یا هەولێرێ ڤەکر. پشترە، پێشانگەهێن وی یێن تایبەت ل بارسەلۆنا (1985)، ئالمونەجار (1988) و ڤالێنسیا (1991)یێن سپانیایێ هاتن لدارخستن.

د ناڤبەرا سالێن 1972 و 2005ان دە، قەرەنی جەمیل بەشداری زێدەتری 30 پێشانگەهێن هەڤبەش و تایبەت ل بەغدا، هەولێر، ئیتالیا، بارسەلۆنا، ئالمونەجار، ڤالێنسا، بروکسەل، كۆپەنهاگن، هۆلەندا، پۆلۆنیا و چەندین باژارێن دن یێن جیهانێ ببوو.