ھەڤسەرۆکا گشتی یا پارتیا وەکھەڤی و دەمۆکراسیێ یا گەلان (دەم پارتی) تولای ھاتیمۆغلاری، دەربارێ پێڤاژۆیا ئاشتیێ دە جارەکە دن بانگ ل دەستھلاتداریێ کر کو گاڤان باڤێژە و گۆت، “ژ بۆ نیشاندانا جدیەت و پاشڤە نەڤەگەریانا پێڤاژۆیێ، پێویستی ب گاڤێن خورت و سەمبۆلیک ھەیە.”
ھاتیمۆغلاری د جڤینا کۆما پارتیا خوەیا ل پارلامەنتۆیێ دە ئاخڤی و گۆت، ئەو د قۆناغەکا ب گازندە و ھێڤی و داخوازان دە نە ژ بۆ پێڤاژۆیا ئاشتیێ، لێ بەلێ پاراست کو ژ بۆ سەرکەفتنا پێڤاژۆیێ ب تێرا خوە پێنگاڤ نەھاتنە ئاڤێتن. وێ گۆت کو بەرپرسێ سەرەکی یێ دڤێت د چارچۆڤەیا پێڤاژۆیا ئاشتیێ دە پێنگاڤان باڤێژە دەستھلاتدارییە و وھا دۆماند: “ئەم جارەکا دن تەکەز دکن؛ دڤێت دەستھلاتداری بێگومان ھندەک پێنگاڤان باڤێژە. ئاڤێتنا پێنگاڤێن ئەرێنی پێویستە.”
دەربارێ داخویانیا سەرۆکێ پارلامەنتۆیێ نومان کورتولموش یا ل سەر ئاڤاکرنا کۆمیسیۆنەکێ، ھاتیمۆغلاری ئەو “گەلەکی گرینگ” نرخاند و وھا پێ دە چوو: “مە د ھەڤدیتنا خوە دە نێرینێن خوە پارڤە کرن. وەکە دەم پارتی مە تەکەز کر کو گرینگە کۆمیسیۆن ب ئاوایەکی ئەنجامگر بخەبتە. وەلاتی وەخت نینە کو بهێت مژوولکرن و دڤێت دەملدەست ب ئاوایەکی چالاک دەست ب کارێ خوە بکە. “
ھەروھا گۆت: “ئەم بەحسا میکانیزمەکا کو نە تەنێ گۆتنان چێبکە، پێشنیارێن بەرجەستە پێش بخە و خوەدی دەمنامە بت دکن. نابە کو پرسگرێکێن ڤی وەلاتی ژ بۆی کۆمیسیۆنێ بێن شاندن و ل ور ژ بۆ رزاندنێ بێن ھشتن. ژ بەر ڤێ یەکێ دڤێت کۆمیسیۆن دەملدەست بهێت ئاڤاکرن.”
د داویێ دە ھاتیمۆغلاری گۆت، “ژ رێڤەبەریێن ھەرێمی ھەتا بێچەکبوونێ، ژ کارووبارێن دادوەریێ ھەتا مافێن ھەڤپار، گەلەک رۆژەڤێن ژیانی ل پێشیا مە نە،” تەکەز کر ژی: “ب کۆمیسیۆنەکا بباندۆر، پێنگاڤێن بلەز دکارن بێن ئاڤێتن. دڤێت ئەڤ کۆمیسیۆنە گوھ بدە دەنگێ دیرۆک و ئاشتیێ. دڤێت وەکە کۆمیسیۆنەکا کو ئاشتیێ ئاڤا دکە، بکەڤە دیرۆکێ.”
