سەرۆکێ شێورمەندێن سەربازی یێن ھەڤپەیمانان ل ھەرێما کوردستانێ کۆلۆنێل براندستێتەر ژ ئەرکێ خوە بداوی ھات و ب وەزیرێ پێشمەرگە رە راگھاند، “مە کاریە لگەل وەزارەتا پێشمەرگە دەستکەفتیێن پر باش ب دەست بخن و ئەم ھێڤیدارن کو، پێڤاژۆیا چاکسازیێ سەرکەفتی بە و ئەنجامێن وێ ژ بۆ ھێزێن پێشمەرگەیان بێن بدەستخستن.”
وەزیرێ پێشمەرگە یێ حکوومەتا ھەرێما کوردستانێ شۆرش ئیسماعیل ئیرۆ سێشەمبێ، پێشوازیا سەرۆکێ شێورمەندێن سەربازی یێن ھەڤپەیمانان ل ھەرێما کوردستانێ کۆلۆنێل براندستێتەر کر، کو ئیرۆ ئەرکێ وی ل ھەرێما کوردستانێ بداوی ھات.
ل گۆری راگھاندنا وەزارەتا پێشمەرگە، وەزیرێ پێشمەرگە د وێ جڤینێ دە پەسنێ بزاڤ و گاڤێن گرینگێن کۆلۆنێل براندستێتەر د دەما ئەرکێ وی دە دا کریە و گۆت، “کۆلۆنێل براندستێتەر وەکی خەمخوەر و دلسۆزەکێ ھێزێن پێشمەرگەیێن کوردستانێ ھەر تم لگەل وەزارەتا پێشمەرگە بوو و پشتەڤانیا وەزارەتا وان کریە.”
وەزیرێ پێشمەرگە زێدەباری دیارکرنا رێزێن خوە و وەزارەتا پێشمەرگە ژ بۆ وان دەستکەفتیێن کو ب ئالیکاری و شێورمەندیا تیما بلند یا ھەڤپەیمانان ژ بۆ وەزارەتا پێشمەرگە ھاتنە بدەستخستن ئانی زمان و گۆت، “ئەڤ دەستکەفتی ب تایبەتی د پێشڤەچوونا پێڤاژۆیا چاکسازی و ئاڤاکرنا فرقەیان دە ھاتنە بدەستخستن.”
کۆلۆنێل براندستێتەر د بەرسڤا خوە دە گۆت، “ئەز کێفخوەش بووم کو، د دەما ئەم ب ھەڤ رە بوون دە، مە وەکی تیمەک لگەل وەزارەتا پێشمەرگە ژ بۆ بھێزکرن و خورتکرنا ھێزێن پێشمەرگەیێن کوردستانێ کار کر. مە کاری دەستکەفتیێن گەلەک باش ب دەست بخن.” ھێڤی ژی کر کو، پێڤاژۆیا چاکسازیێ سەرکەفتی بە و ئەنجامێن وێ ژ بۆ ھێزێن پێشمەرگەیان بێن بدەستخستن.
