جیگرێ سەرۆکێ جڤاتا نوونەرێن ئیراقێ راگهاند، «پشتی بریارا وەزارەتا دارایی یا ئیراقێ ل سەر نەشاندنا مووچەیێن هەرێما کوردستانێ، مە ب سەرۆکوەزیرێ ئیراقێ رە دەست ب دانووستاندنان کر».
جیگرێ سەرۆکێ جڤاتا نوونەرێن ئیراقێ شاخەوان عه‌بدوللا دوهـ سێشەمێ 3ێ هەزیرانا 2025ێ راگهاند، «مە قەت نەخوەستییه کو ئەم بەحسا بزاڤێن خوە بکه‌ین و وان بزاڤان بفرۆشینه خەلکی. پشتی بریارا وەزارەتا دارایی، مە ب سەرۆکوەزیرێ ئیراقێ را دەست ب دانووستاندنان کر. بەری دو رۆژان مە جڤینەک ساز كر، زێدەتری دو ده‌مژمێران ڤەکێشا».
شاخەوان عه‌بدوللا هەروەسا گۆت، «مە د جڤینا ناڤبەرا خوە دا بەحسا وورده‌كاری، پرسگرێک و سەدەمێن نەشاندنا مووچەیان کر و مە پەیاما سەرۆک بارزانی گەهاند، کو ب چ به‌هانه‌یان نابیت مووچە بهێته برین و مە تەکەز ل سەر داخوازا سەرۆک بارزانی ژ بۆ خەرجکرنا مووچەیان بەری جەژنێ کر».
ناڤبری ئاماژە ژی دا، مە ژ سەرۆکوەزیرێ ئیراقێ را گۆت کو، ڤێ مژارێ دێ ل کوردستانێ رەنگڤەدانەکە خراب هه‌بیت، هه‌ر چه‌نده ئه‌گه‌ر کێمبوونا داهاتێ ناڤخوەیی یێ بەغدایێ یە ژ بەر خالێن کۆنترۆلێ و وەرنەگرتنا گۆمركی، کو داهاتێ خالێن سنۆری مەهانە ب 100 ملیار دیناران کێم بوویە.
جیگرێ سەرۆکێ جڤاتا نوونەرێن ئیراقێ رۆن ژی کر، “من ژ سوودانی را گۆت کو ئاستەنگیێن ل پێشیا هناردەکرنا پەترۆلێ راکه‌ن و بلا ژ نوو ڤە دەست ب هناردەکرنێ بهێته کرن. سوودانی گۆت: بلا دادگەهـ بریارەکێ بدەت و فەرمانەکا وەلائی دەربێخیت، ئەز ژی دێ مووچەیان خەرج كه‌م”.
شاخەوان عه‌بدوللا هەروەسا راگهاند، “پشتی وێ جڤینێ راستەراست سکالا هاته تۆمارکرن، لێ ئەم ب پرسگرێکێن قانوونی رە روو ب روو مان، و مە ژ بەر بێهنڤه‌دانان داخواز کر کو روونشتنا دادگەهێ ل سه‌ر خه‌ت بیت، لێ هێشتا پەژراندن نەهاتیە”.
