ئەندامەکێ مەکتەبا سیاسی یا په‌ده‌كێ ئاماژەیێ ددە کو، جەزاکرنا بکۆم و برسیکرنا وەلاتیێن هەرێما کوردستانێ ب به‌هانه‌یێن دارایی و ئیداری بێ ئەنجام و جەزاکرن دەرباز نابە.
ئەندامێ دەستەیا برێڤەبەر یا مەکتەبا سیاسی یا پارتیا دەمۆکراتا کوردستانێ هۆشیار زێباری دوهی سێشەمیێ، 3ێ هەزیرانا 2025ێ ل سەر پلاتفۆرما Xێ نڤیسی، «بریارا حکوومەتا محەمەد شه‌یاع سوودانی – چارچۆڤەیا هەڤاهەنگیێ یا راوەستاندنا مووچەیێن فەرمانبەرێن هەرێما کوردستانێ د دەمەکێ گەلەک نەخوەش دا یە».
هۆشیار زێباری ئاماژە ژی دا، «جەزاکرنا بکۆم و برسیکرنا وەلاتیێن هەرێما کوردستانێ ب به‌هانه‌یێن دارایی و ئیداری د دەمەکێ گەلەک نەخوەش دا یە و بێ ئەنجام و جەزاکرن دەرباز نابە».
ئەندامێ دەستەیا برێڤەبەرا مەکتەبا سیاسی یا په‌ده‌كێ هەروەسا گۆت: «ئەم ل باژارێ خەونان – ئوتۆپیایێ – ناژین و دیرۆکا مە یا سیاسی ژی ئاماژەیێ ددە کو ئێریشکەر تێن جەزاکرن».
ناڤبری هەروەسا نڤیسیە، «بەرژەوەندیا محەمەد شه‌یاع سوودانی و چارچۆڤەیا هەڤاهەنگیێ یا دەستهلاتدار چیە کو، د ڤی دەمی دا ژ بۆ مووچەیێن فەرمانبەرێن هەرێما کوردستانێ پرسگرێکان دئافرینن؟».
هۆشیار زێباری ئاماژە ژی دابوو، «ئەڤ د دەمەکی دا یە کو، وەلات نێزیکی هلبژارتنان دبە. دبە کو پرسگرێکێن تەکنیکی هەبن، لێ بریارا وەزارەتا دارایی یا فەدەرال سیاسی و بەرنامەکرییە ل دژی هەرێمەکا دەستووری، کو بێ گومان دێ رەنگڤەدان هەبە».
