پارتیا وەلاتپارێزێن کوردستانێ (PWK) ب داخویانیەکێ، نێرینێن رێبەرێ پەکەکێ عەبدوللاھ ئۆجالان یێن د مەتنا وی یا ب ناڤێ “پەرسپەکتیف” دە ھاتنە وەشاندن، ب توندی رەخنە کر. PWK گۆت، ئەڤ نێرین “سڤکاتیەکا مەزنە ب گەلێ کورد، زمانێ کوردی و سەرۆکێن نەتەوەیی” و بانگ ل ئۆجالان کر کو لێبۆرینێ بخوازە.
PWK مەتنا ئۆجالان یا کو ژ بۆ کۆنگرەیا 12ێ یا پەکەکێ شاندیە و د ھەژمارا 521ێ یا رۆژنامەیا سەرخوەبوونێ دە (گولان 2025) ھاتیە وەشاندن، وەک “ھەولدانەک ژ بۆ پووچکرنا تێکۆشین و بیرا نەتەوەیی یا کورد” ب ناڤ کر.
“نێرینێن ئۆجالان دوبارەکرنا گۆتارا دەولەتا ترکە”
ل گۆری داخویانیا PWK، نێرینێن ئۆجالان یێن دەربارێ پرسگرێکا کورد و کوردستانێ دە، د ئەساسێ خوە دە نە تشتەکی نوو نە و وەک “نووژەنکرنا گۆتارا 100 سالی یا دەولەتا ترک” تێن نرخاندن. PWK دیار دکە کو تێگەهێن وەک “نەتەوەیا دەمۆکراتیک” و “وەلاتێ ھەڤپار” کو ژ ئالیێ ئۆجالان ڤە تێن بکارئانین، د راستیێ دە گوھەرتۆیەکا دن یا فەراسەتا “ئێک دەولەت، ئێک مللەت”ە. د داخویانیێ دە تێ گۆتن: “ئەڤ نێرینە، چارەسەریێن وەک فەدەراسیۆن، خوەسەریا ئیداری و مافێن کۆلەکتیفێن نەتەوەیی رەد دکە و ب ڤی ئاوایی مافێ گەلێ کوردێ خوە-رێڤەبرنێ ئینکار دکە.”
“بناڤکرنا کوردان وەک ‘جڤاکا سەرگۆ’ سڤکاتییە”
خالەکا دن یا کو PWK ب توندی رەد دکە، ئیفادەیێن ئۆجالان یێن دەربارێ جڤاکا کورد دە نە. د مەتنا ئۆجالان دە ژ بۆ کوردان گۆتنێن وەک “بەرماییا چاندی”، “جڤاکا سەرگۆ” و “گۆرستان” ھاتنە بکارئانین. PWK ڤان گۆتنان وەک “سڤکاتیەکا کو نایێ قەبوولکرن” دبینە و وھا ددۆمینە: “ئەڤ گۆتن، بێرێزییە ل ھەمبەری گەلێ کورد کو ل دژی ھەر جورە کۆمکوژی و ئاسیمیلاسیۆنێ ل بەر خوە دایە، ب سەد ھەزاران شەھید دانە و ھەبوونا خوە پاراستیە. ئەڤ یەک کۆربوونەکا سیاسی و بێوژدانییە.”
“گۆتنا ‘زمانێ کوردی نە فۆنکسیۆنەلە’ پشتگریا ئاسیمیلاسیۆنێیە”
PWK رەخنەیێن خوە ل سەر نرخاندنا ئۆجالان یا ژ بۆ زمانێ کوردی ژی تینە زمان. ئۆجالان د مەتنا خوە دە زمانێ کوردی وەک “زمانەکی نە فۆنکسیۆنەل” ب ناڤ دکە. ل گۆری PWK، ئەڤ نێرین “نیشانەیا نەزانینێ (جەھالەتێ)”یە و ب ئاوایەکی نەراستەراست پشتگریێ ددە پۆلیتیکایێن ئاسیمیلاسیۆنێ یێن دەولەتێن داگیرکەر. د داخویانیێ دە پراکتیکێن پەکەکێ و ھەدەپێ/دەم پارتیێ ژی تێن رەخنەکرن: “ب سالانە زمانێ سەردەست د ناڤ سازیێن وان دە ترکییە. وان دەرسا بژارتەیا کوردی بایکۆت کر و ب ڤێ یەکێ بوون ئاستەنگ کو ب ملیۆنان زارۆکێن کورد فێری زمانێ خوە ببن.”
“سڤکاتیێن ل دژی سەرۆکێن نەتەوەیی یێن کورد نایێن قەبوولکرن”
د داخویانیێ دە تێ دەستنیشانکرن کو ئۆجالان د مەتنا خوە دە سەرۆکێن دیرۆکی یێن کورد وەک مالباتا بارزانیان، بەدرخانیان، شێخ سەعید، سەیید رزا و قازی محەمەد ب “ژودەنرات” (کۆمیتەیێن جھوویێن لگەل نازیان ھەڤکاری دکرن) ددە بەر ھەڤ. PWK ڤێ یەکێ وەک “ئێرش و سڤکاتییەکا ئاشکەرا” دبینە و دبێژە: “تاوانبارکرنا سەرۆکێن کو ژیانا خوە ژ بۆ دۆزا کوردستانێ فەدا کرنە ب ‘ھەڤکاری’ و ‘خیانەتێ’، دەرەوەکێ دیرۆکییە و ب چ ئاوایا نایێ قەبوولکرن.”
“ئیدیعایێن ل سەر ھەرێما کوردستانێ دەرەون”
PWK ئیدیعایێن ئۆجالان یێن کو دبێژە “دەولەتا فەدەرەیا باشوورێ کوردستانێ ب پشتگریا ترکیەیێ ژ بۆ تەسفیەکرنا پەکەکێ ھاتیە ئاڤاکرن” ب توندی رەد دکە. د داخویانیێ دە تێ ببیرخستن کو دەستکەفتیا فەدەرالا باشوورێ کوردستانێ بەرھەما تێکۆشینا سەد سالی و خوینا ب سەد ھەزاران شەھیدانە. PWK بالێ دکشینە سەر ناکۆکیا کو ئۆجالان ب خوە شاندە دشاند جەم ھەمان سەرۆکێن کو ئیرۆ وان ب “ژودەنرات”بوونێ تاوانبار دکە.
بانگا داوی: “بلا کەس بێدەنگ نەمینە”
د داویا داخویانیێ دە، PWK بانگ ل ھەموو پارتی، رێخستن، رەوشەنبیر و گەلێ کورد ل ھەر چار پارچەیێن کوردستانێ و دیاسپۆرایێ دکە کو ل ھەمبەری ڤان نێرینێن ئۆجالان بێدەنگ نەمینن و ھەلوەستەکا نەتەوەیی نیشان بدن. PWK بانگ ل عەبدوللاھ ئۆجالان دکە کو ژ بەر ڤان گۆتنێن خوەیێن ل دژی گەلێ کورد، زمانێ وی، دیرۆکا وی و سەرۆکێن وی، ب ئاوایەکی فەرمی لێبۆرینێ بخوازە.
