بەردەڤکا پارتیا وەکھەڤی و دەمۆکراسیێ یا گەلان (دەم پارتی) عایشەگول دۆگان راگھاند، رێبەرێ گرتی یێ پەکەکێ عەبدوللاھ ئۆجالان ژ بۆ گۆتووبێژکرنا پێڤاژۆیەکا نوو یا ئاشتیێ، داخوازا ھەڤدیتنا سەرۆک مەسعوود بارزانی کریە.
عایشەگول دۆگان ئیرۆ 11ێ خزیرانێ د کۆنفەرانسەکا رۆژنامەڤانی دە، دەربارێ ھەولدانێن نوو یێن ئاشتیێ ل ترکیە و باکورێ کوردستانێ و ھەڤدیتنێن خوە یێن لگەل ئۆجالان ئاخڤی.
“ئۆجالان دخوازیت پێوەندیێ ب سەرکردەیێن کورد بکە”
دۆگان گۆت، عەبدوللاھ ئۆجالان گرینگیەکا مەزن ددە ھەڤدیتن و دیالۆگێ لگەل ھەموو ئالیێن کوردی و وھا ئاخڤی: “برێز ئۆجالان دخوازیت لگەل بەرپرسێن سەرەکی یێن پارتیێن کوردی تێکلیێ دەینە و باخڤە، د ناڤ دە سەرۆک مەسعوود بارزانی، نێچیرڤان بارزانی، مەزلووم عەبدی و بافل تالەبانی.”
بەردەڤکا دەم پارتیێ تەکەز کر، “ئەم ژی ڤێ یەکێ دخوازین، ژ بەر کو گرینگیەکا وێ یا مەزن ژ بۆ پێڤاژۆیێ ھەیە و ئەگەر ھەیە کو د رۆژێن پێش دە ئەڤ یەک پێک بێ.”
دۆگان ھەروھا دیار کر، ئەو ئامادەکاریان دکن کو د دەمەکێ نێزیک دە جارەکا دن سەردانا ئیمرالیێ بکن و گۆت: “ئەم دێ لگەل برێز ئۆجالان قۆناخا بهێت یا پێڤاژۆیا ئاشتیێ گۆتووبێژ بکن.”
ل سەر گاڤێن پێشەرۆژێ یێن پێڤاژۆیێ، دۆگان بال کشاند سەر پێویستیا دامەزراندنا میکانیزمەکا فەرمی و گۆت: “پێڤاژۆیەکێ دەست پێ کریە، برێز ئۆجالان بانگ کر و پەکەکێ کۆنگرەیا خوە لدار خست. باشە، قۆناغا پاشێ دێ چ بت؟ د راستیێ دە بەرسڤا ڤان پرسان، ئاڤاکرنا کۆمیسیۆنەکا پارلەمانییە ژ بۆ برێڤەبرنا پێڤاژۆیێ.”
د داویا ئاخافتنا خوە دە، دۆگان بانگ ل سەرۆکێ پارلەمانتۆیا ترکیەیێ کر و گۆت: “پێویستە بەریا دەستپێکرنا بێهنڤەدانا ھاڤینێ یا پارلەمانی، ئەڤ کۆمیسیۆنە بهێت ئاڤاکرن و جڤینەک دەربارێ شێوازێ کارێ وێ دە بهێت لدارخستن.”
ھەتا نھا شاندەیا دەم پارتیێ، دەربارێ پێڤاژۆیا نوو یا ئاشتیێ دە، پێنج جاران ل گراڤا ئیمرالیێ لگەل عەبدوللاھ ئۆجالان جڤیایە.
