ئارتێشا ئیسرایلێ راگھاند، ئەو دێ د ئێرشێن خوە یێن ل سەر ئارمانجێن د ناڤ ئاخا ئیرانێ دە بەردەوام بن. ئەڤ داخویانی د دەمەکێ دە تێ، کو ھەر دو ئالی ب مووشەکان ئێرشی پایتەختێن ھەڤ دکن و ئالۆزی گھیشتیە ئاستا ھەری بلند. ل تەل ئەبیب و قودسێ وەلاتی د ستارگەھان دە نە.
ئارتێشا ئیسرایلێ ئیرۆ 14ێ خزیرانا 2025ێ د داخویانیەکێ دە تەکەز کر، ئەو ئێرشێن خوە یێن ل سەر ئیرانێ راناوەستینن و دێ ل سەر ئارمانجێن خوە بەردەوام بن.
د بەربانگا ئیرۆ دە، ئیسرایل و ئیرانێ گەلەک مووشەک ئاڤێتن پەیتەختێن ھەڤدو و زیانەکا مەزن گھاندن ھەڤ. ھێزێن ئاسمانی یێن ئیسرایلێ، لگەل کارگەھێن چێکرنا مووشەکان، پرۆژەیێن ئەتۆمی یێن ئیرانێ کرنە ئارمانجا خوە یا سەرەکی.
رەوشا ل ئیسرایلێ
ل باژارێن تەل ئەبیب و قودسێ سیرەنێن ھشیاریێ لێ کەتن. ئەڤە دو رۆژن کو وەلاتیێن ڤان باژاران ژ بەر ترسا ئێرشان د ستارگەھان دە دمینن. تەڤی کو سەرۆکوەزیرێ ئیسرایلێ بەنیامین نەتانیاھو گەلەک جاران داخواز کر کو وەلاتی ژ ستارگەھان دەرکەڤن و ژیانا خوەیا نۆرمال بدۆمینن، لێ ئێرشێن بەردەوامێن ئیرانێ ترسەکا مەزن د ناڤا وەلاتیێن ئیسرایلێ دە چێکریە. ل گۆری وان، ئێرشێن ئیرانێ “گەلەک توند و ب ھێزن”.
ئارتێشا ئیسرایلێ ئەشکەرە دکە، سیستەما وان یا بەرەڤانیا ئاسمانی، کو وەک “قوبەیا ئاسنی” تێ ناسکرن، ب بەردەوامی مووشەکێن ئیرانێ ل ئەسمانێ تەل ئەبیبێ بێباندۆر دکە.
لێ د ھەمان دەمێ دە ھات راگھاندن کو شەڤا بۆری، ژ بلی یێن کو ھاتین خستن، چەند مووشەکێن ئیرانێ ل ناڤ باژێر کەتنە خوارێ. ئارتێشێ ھەروھا دا زانین کو تیمێن ھاوارچوونێ ل سەرانسەرێ وەلات ھاتنە بەلاڤکرن و ھەتا نھا د ئێرشێن ئیرانێ دە ت زیانێن جانی چێنەبوونە.
رەوشا ل ئیرانێ و داخویانیێن داوی
ژ ئالیێ دن ڤە، ئاژانسا نووچەیان یا ئیرانێ تەسنیمێ راگھاند، دەنگێ تەقینێن بھێز ل پایتەخت تەھرانێ ھاتن بھیستن، لێ دەربارێ سەدەم و زیانێن تەقینان دە چ ئاگاھیێن زێدەتر بەلاڤ نەکرن.
د قادا دیپلۆماتیک دە ژی داخویانی بەردەوامن. بالیۆزێ ئیسرایلێ یێ ل نەتەوەیێن یەکگرتی راگھاند، وەلاتێ وی “نێزیکی ژناڤبرنا تەڤاھیا بنەسازیا ئەتۆمی یا ئیرانێ بوویە.”
د بەرسڤێ دە، ئیرانێ ژی راگھاند کو وان چەند درۆنێن بۆمبەبارکری یێن ئیسرایلێ ل ھەرێما سەلماسێ یا ل باکورێ رۆژئاڤایێ وەلات خستنە خوارێ.
