چاڤکانیێن ئیراقێ بەحسا وێ یەکێ دکن کو حکوومەتا ئیراقێ ھەول ددە کۆمێن ئیراقی یێن هەڤالبەندێن تەھرانێ کۆنترۆل بکە و رێ ل بەر دەستوەردانا وان د شەرێ د ناڤبەرا ئیسرایل و ئیرانێ دە بگرە، لێ چاڤکانیێن ئیراقی گۆتن کو ڤان کۆمان چ سۆز د ڤێ دەربارێ دە نەدایە.
ل ئیراقێ ب گشتی رەوشەک بەندەواریێ، ترس و فکارێ ھەیە، د رەوشا تەڤلێبوونا وەلات د چەرخا شەری دە، ب تایبەتی ژ بەر کو بالافرێن شەری یێن ئیسرایلێ ژ دوھ ڤە قادا ھەوایی یا ئیراقێ دەرباس کرنە و چ گارانتیەک راستین نینە کو کۆمێن نێزیکی ئیرانێ سیاسەتا دوورکەتنا ژ وی شەری برێڤە ببن.
ل گۆری راپۆرتێن مەدیایێ، حکوومەتا سوودانی پر دترسە کو کۆمێن میلیشیا تشتەکی بکن دا کو ئیراقێ تەڤلی شەری بکن، دەرڤەیی وێ ژی چ دەستھلاتەکا وی ژی ل سەر ڤان کۆمان نینە.
لێ چاڤکانیەکی کو نەخواست ناڤێ وی بێ ئەشکەرا کرن ژ ئەل عەرەبیە ئەل جەدید رە راگەھاند وان کۆمان چ سۆز نەدایە حکوومەتا ئیراقێ کو دەستوەردانێ نەکن.
لێبەلێ، ل گۆری راپۆرتێن مەدیایێ، ژ لایێ ڤان کۆمان ڤە چ گەفێن راستەراست یان ئامادەبوونا دەستوەردانێ نینە. لێ میلیشیایێن حزبوللاھا ئتراقی ھێزێن ئامەریکی تاوانبار کرن کو ب ڤەکرنا قادا ھەوایی یا ئیراقێ، ژ بۆ ئێریشا ئیسرایلێ یا ل دژی ئیرانێ ھێسان کرنە و بانگ ل حکوومەتێ کرن کو ” تەڤاهیا لەشکەرێن ئەمریکی ژ وەلاتی دەربخە.”
حزبوللاھا ئیراقێ دوھ ب بەیانامەیەکی راگەھاند: “ھێزێن ئامەریکی یێن ل ئیراقێ ب ڤەکرنا قادا ھەوایی یا ئیراقێ ڤە رێیەکا ئەولە ژ بۆ ھێزێن ھەوایی یێن ئیسرایلێ ڤەکرنە، رێیەکا ئارام ل بەر ڤێ ئێریشێ چێکرنە. گەر تێ گۆتن کو ئەم ناخوازین ئیراق ببە قادا شەری، دڤێت رۆلا ھێزێن بیانی یێن ل سەر ئاخا ئیراقێ و ئەوێن کو ئەسمانێ وێ کۆنترۆل کرنە دڤێت بێن کۆنترۆل کرن.
د ھەمان دەمێ دە، سەرۆکێ میلیشیایێن نوجەبا ئەکرەم کەعبی، بانگ ل حکوومەتا ئیراقێ کر کو “ھێزێن ئەمریکی ب تەڤاھی ژ ھەموو ئاخ و قادا ھەوایی یا ئیراقێ بکە دەر.”
کەعبی د تۆرا جڤاکی یا Xێ دە راگەھاند: “بنپێکرنا ئەشکەرە یا سەروەریا ئیراقێ و بەزاندنا قادا ھەوایی یا وێ ب ھەماھەنگیا ل گەل ئامەریکایێ گەلەک جاران ھاتیە دوبارەکرن و بێ سزا نامینە.”
ژ ئالیێ خوە ڤە، میلیشیایێن ئەھل ئەل-حەق، ب سەرۆکاتیا قەیس خەزعەلی، بانگ ل ھەموو ئەنیێن بەرخوەدانێ کر کو ئامادە بن.
د بەیانامەیەکی دە خەزعەلی گۆت: “دڤێت ھەموو ئەنیێن بەرخوەدانێ نۆرمالیزەکرنا تێکلیێن لگەل ئیسرایلێ رەد بکن و ئامادە بن کو ژ بۆ راستیێ شەری بکن. ئامادە بن ژ بۆ سەرخستنا ھەقیێ.”
ھەروەھا گۆت: “ئەڤە تاوان و بنپێکرنە بێ سزا نامینن.”
ژ ئالیێ دن ڤە بانگ ل رایەدارێن حکوومەتا ئیراقێ کر: “ھەموو تەدبیرێن پێویست بگرن دا کو پێشی ل دەرباسبوونا ئیسرایلێ ژ قادا ھەوایی یا ئیراقێ بگرن، ھێزێن چەکدار ب سیستەمێن پاراستنا ھەوایی یێن کو دکارن تەسپیت بکن و بەرسڤ بدن و تەسلیمی زەختا ئەمریکی نەبن کو رێ ل بەر ئیراقیان دگرە کو سەروەریا خوە بپارێزن.”
