ھەژمارا قوربانیێن ئێریشا ئیرانێ یا ل سەر ئیسرایلێ زێدە بوو

 پۆلیسێن ئیسرایلێ ئامارا داوی یا زیانێن جانی یێن ئێریشێن مووشەکی یێن ئیرانێ یێن ل سەر وەلاتێ خوە ئەشکەرە کرن. ل گۆری ئامارێن نوو، د ئێریشێن دو رۆژێن داوی دە ب گشتی 14 کەس ھاتنە کوشتن و زێدەتری 400 کەسێن دن ژی بریندار بوونە.

بەردەڤکێ پۆلیسێن گشتی یێ ئیسرایلێ دانیێل ھاداد ئیرۆ 15ێ خزیرانێ راگھاند، تەنێ د ئەنجاما ئێریشا داوی یا ئیرانێ یا بەربانگێ دە کو تەل ئەڤیڤ و چەند دەڤەرێن دن کرن ئارمانج، 10 کەس ھاتن کوشتن و زێدەتری 180 کەسێن دن ژی بریندار بوون.

ل گۆری چاڤکانیێن مەدیایی، پاسدارێن ئیرانێ د ڤێ ئێریشێ دە زێدەتری 80 مووشەکێن بالستیک بکار ئانینە.

مەدیایا ئیسرایلێ ئاماژە ب وێ یەکێ کر، ئێریشێن مووشەکی یێن بەربانگێ زیان گھاندیە زێدەتری 70 ئاڤاھیێن سڤیل، کو د ناڤ دە خانی، دبستان و ئەنستیتو ھەنە. ھەروھا ھات راگھاندن کو زێدەتری 35 کەسان د بن کاڤلێن ئاڤاھیێن ھلوەشیایی دە ئاسێ مانە. تیمێن بەرەڤانیا سڤیل ھندەک ژ وان رزگار کرنە و ھەولێن رزگارکرنایێن دن ددۆمن.

ھەڤدەم لگەل ئێریشا ئیرانێ، حووسیێن یەمەنێ ژی چەند مووشەک ئاراستەیی ئیسرایلێ کرن. بەردەڤکێ حووسیان یەحیا سەری راگھاند، وان ئێریش ب ھەماھەنگیا لگەل بەرپرسێن ئیرانێ پێک ئانیە و تەکەز کر کو ئەو دێ د پشتگریا خوە یا ژ بۆ تەھرانێ دە بەردەوام بن.

ئێریشێن ئیرانێ وەک بەرسڤدانا ئێریشێن ئیسرایلێ تێن، کو ھەتا ئیرۆ یەکشەمبێ ژی بەردەوامن. رێبەرێ بلندێ ئیرانێ، عەلی خامنەیی، گەف ل ئیسرایلێ کرن و گۆت کو “بەرپرسێن تەل ئەڤیڤێ دێ بەدەلەکا گران ژ بۆ دەستدرێژیێن خوە بدن.”