شاندەکا پارتیا وەکھەڤی و دەمۆکراسیێیا گەلان (دەم پارتی) لگەل سەرۆکێ پارلامەنتۆیا ترکیەیێ نومان کورتولموش جڤیا و ب ئاوایەکی فەرمی پێشنیار کر، ژ بۆ چارەسەریا پرسا کورد کۆمیسیۆنەکا لێکۆلینێ یا پارلامەنتۆیێ بێ ئاڤاکرن.
شاندا دەم پارتیێ کو ژ جیگرێن ھەڤسەرۆکێن فراکسیۆنێ گولستان کلچ کۆچیگیت و سەزای تەمەلی پێک دھات، ل پارلامەنتۆیێ سەردانا سەرۆکێ پارلامەنتۆیێ نومان کورتولموش کر.
پشتی جڤینێ، دەم پارتیێ راگھاند، وان د ھەڤدیتنێ دە مژارا چارەسەریا پرسا کورد و ئاڤاکرنا کۆمیسیۆنەکا تایبەت یا پارلامەنتۆیێ ژ بۆ ڤێ پێڤاژۆیێ گۆتووبێژ کرنە.
ل گۆر داخویانیێ، سەرۆکێ پارلامەنتۆیێ نومان کورتولموش ب ئەرێنی پێشوازی ل پێشنیارێ کریە.
جیگرا ھەڤسەرۆکێ فراکسیۆنا دەم پارتیێ گولستان کلچ کۆچیگیت، دەربارێ ناڤەرۆکا جڤینێ دە زانیاریێن بەرفرەھتر دان و گۆت: “ئەم دەربارێ پێکانینا کۆمیسیۆنا پارلامەنتۆیێ دە ئاخڤین. مە پێشنیارێن خوە کرن. وی ژی گۆت، ئەو ب ئەرێنی نێزیکی پێکانینا کۆمیسیۆنێ دبە و د دەمەکێ کورت دە ئەو دێ ل گەل نوونەرێن پارتیێن سیاسی بجڤە. ئەم چاڤەرێ دکن بەریا کو پارلامەنتۆ بکەڤە بێھنڤەدانێ کۆمیسیۆن بهێت دامەزراندن و وەرزێ ھاڤینێ کار بکە.”
