د رۆژا 13ێ خزیرانا 2025ێ دە، ئیسرایلێ د بن ناڤێ ئۆپەراسیۆنا “رابوونا شێر” ژ نشکاڤە ئێریشی سەر دەزگەهێن مووشەکی و ئەتۆمی یێن ئیرانێ کر، د بەرسڤا ڤان ئێریشان دە ژی ئیرانێ ئۆپەراسیۆنا “سۆزا راست 3” دا دەستپێکرن و ب مووشەکێن بالستیک و درۆنان ئێریش برن سەر ئیسرایلێ، ئەڤ پەڤچوون هەر کو دچە گەرمتر دبن و نایێ زانین کا دێ کەنگێ ئەڤ رەوشە ب داوی وەرە.
لگەل ئۆپەراسیۆنا ئیسرایلێ یا ل دژی ئیرانێ، رەوشا ناڤخوە یا ئیرانی گەلەک تێک چوو، رەژێما ئیرانێ هەما بێژە نێزی ژناڤچوونێ بوویە، ئیسرایلێ ئاسمانێ ئیرانێ کۆنترۆل کریە و وەکە ئەو دخوازە بکار تینە، بالافر و درۆنێن ئیسرایلێ وەکە کو ل وەلاتێ خوە بن ب هەمان ئاوایی ل ئاسمانێ ئیرانێ دفرن و ئارمانجێن خوە هەدەف دگرن. پرانییا بەرپرسێن پایەبلند یێن سوپایێ پاسدارێن ئیرانێ هاتنە کوشتن، گەلێ تەهرانێ ژ بۆی پاراستنا ژیانا خوە نەچار مان ژ باژار دەرکەڤن، بەنکێن ئیرانێ نەما بکاربن خزمەتگوزاریان پێشکێشی گەل بکن، نان، بانزین و دەرمان ب هێسانی ب دەست خەلکی ناکەڤن و هتد… ئانکو ئیران ب تەمامی هاتیە لاوازکرن و تێ تەخمینکرن رەژێما ئیرانێ ژی وەکە رەژێما ئەسەد یەک چارەنڤیس تەجرووبە بکە.
د ڤێ دەمێ دە کو هەر کەس ل بەندا هلوەشاندنا رەژێما ئیرانێ یە، پەکەکە و باسکا وێ یا رۆژهلاتێ کوردستانێ وەکە هەرجار بەرەڤاژی داخوازی و بەرژەوەندیێن گەلێ کورد تەڤ دگەرە و لگەل ئیستیخباراتا ئیرانێ مژوولی هەڤدیتنێن نهێنی یە و تێ گۆتن ئیستیخباراتا ئیرانێ و پەکەکێ-پژاکێ لهەڤ کرییە کو هەگەر رەوشا ئیرانێ زێدەتر خەراب ببە، هەمان سەناریۆیا رۆژئاڤایێ کوردستانێ ئانکو رادەستکرنا رۆژهلات ب پەکەکێ جیبجی بکن، لێ بەلێ هەیانی نها بریارا داویێ نەهاتیە دایین کا ئەڤ سەناریۆ دێ کەنگی و ب چ ئاوا وەرە ئەنجامدایین، ژ بەر کو هێژان ئیران ب فکارە ب رێیا دانوستاندنا لگەل ئامەریکا و ئیسرائیلێ ڤێ کریزێ دەرباس بکە.
لگەل دەستپێکرنا شەرێ ناڤخوە یێ سووریەیێ د سالا 2012ێ دە، کوردان ژی وەکە تەڤ گەلێن دن یێن ل سووریەیێ ژیان دکن خوەست تەڤلی شۆرەشێ ببن و ب ڤێ یەکێ ئازادیا خوە ب دەست بخن، لێ بەلێ کورد هەر د زوو دە هاتن بێدەنگ کرن و پەرچقاندن. ئالیێ کو رێ نەدای کورد ب مافێن خوە یێن نەتەوی شاد ببن نە رەژێم بوو بەلکو پەکەکە بوو، پەکەکێ ل گۆری لهەڤهاتنەکێ کو د بن سەرپەرشتییا ئیرانێ دە هات ئەنجامدایین، ب دامەزراندنا پارتییا یەکیتییا دەمۆکراتیک پەیەدێ شەرێ ب وەکالەت ژ بۆی رەژێما ئەسەد دا دەستپێکرن.
ل گۆری ڤێ لهه‌ڤهاتنێ، حكوومه‌تا سووریه‌یێ ژ په‌یه‌دێ خوه‌ست، پاراستنا باكوورێ سووریێ ئه‌ركا وان به. په‌یه‌دێ یەکەمجار كوردێن نه‌رازی یێن كو د گۆتن «الشعب یرید اسقاط النظام» ته‌پساندن پشتره به‌رژه‌وه‌ندیێن ره‌ژیما ئه‌سه‌د ل رۆژئاڤا پاراستن، ئانگو «شه‌ره‌كی ب وه‌كاله‌ت» پێش ره‌ژیمێ ڤه مه‌شاند، پەکەکە نها ژی دخوازە ب رێیا پژاکێ هەمان سەناریۆ ل رۆژهلاتێ کوردستانێ دوبارە بکە و لهەڤهاتنا دەستپێکی د نێڤبەرا پەکەکێ و ئیستیخباراتا ئیرانێ دە هاتیە کرن.
پەکەکە بوویە دارێ د دەستێ دژمنێن کوردان دە، هەر دژمەنکی کوردان کو بخوازە ب رێیا کوردان ب خوە کوردان بتەپسینە، پەکەکێ بکار تینە.
