شاندەکا خوەجھیا عەفرینێ یا ئەنجوومەنا نشتمانی یا کورد ل سووریێ (ئەنەکەسێ) سەردانا رێڤەبەرێ نوویێ عەفرینێ مەسعوود بەتال کر و داخواز کر، داوی ل بنپێکرنێن ل دژی خەلکێ وەرە ئانین و رێڤەبەریا ھەرێمێ ب تەمامی رادەستی خەلکێ وێ وەرە کرن.
بەرپرسێ خوەجھیا عەفرینێ یا ئەنەکەسێ ئەحمەد حەسەن ل ھەژمارا خوە یا تۆرا جڤاکی “فەیسبۆکێ” بەلاڤ کر، سەردانا وان یا ئیرۆ 18ێ خزیرانێ ژ بۆ رێڤەبەرێ نوو یێ عەفرینێ مەسعوود بەتال، ب مەبەستا پیرۆزکرنا دەستبکاربوونا وی بوو.
دیار کر ژی، سەردانێ دە شاندێ مەرتالەک کو ئالا سووریەیا نوو و ئالا کوردستانێ ل سەر بوون، وەک دیاری پێشکێشی بەتال کر.
د ھەڤدیتنێ دە، شاندا ئەنەکەسێ بال کشاند سەر رەوشا خەلکێ عەفرینێ و بەحسا بنپێکرنێن کو ژ ئالیێ “بەرماھیێن کۆمێن چەکدار” ڤە تێن کرن، کر.
شاندێ ب تایبەتی تەکەزی ل سەر ڤان بنپێکرنێن ل ژێر کر کو دڤێت دەملدەست نەمینن:
– ستاندنا باجێن نەیاسایی ژ وەلاتیان.
– دەستدانینا سەر مال و ملکێن خەلکێ.
– گرتنا جوانان یا بێحەق ژ بۆ ستاندنا فدیەیان.
د داخویانیا بەرپرسێ خوەجھیا عەفرینێ دە ھات ژی، داخوازا سەرەکی یا ئەنەکەسێ ئەو بوو کو “رێڤەبەری و ئاساییشا ھەرێما عەفرینێ دڤێت د دەستێ خەلکێ وێ یێ رەسەن دە بە.”
ھەروھا، د ھەڤدیتنێ دە بەحسا پاشەرۆژا سووریەیێ پشتی ھلوەشینا رەژیما دیکتاتۆری یا بەشار ئەسەد ژی ھاتە کرن. ھەروھا شاندا ئەنەکەسێ تەکەزی ل سەر پێویستیا ئاڤاکرنا “سووریەیەکا دەمۆکراتیک، پرئالی، پارلەمانی و نەناڤەندی” کر، کو تێ دە ھەموو پێکھاتە د ناڤ ئازادی و روومەتێ دە بژین.
دیار کر ژی، د چارچۆڤەیا ھەمان سەردانان دە، شاندا خوەجھیا عەفرینێ یا ئەنەکەسێ سەردانا جیگرێ سەرۆکێ ئەنجوومەنا شارەداریێ یا باژارێ عەفرینێ محەمەد شێخ رەشید ژی کر.
