نڤیسگەها لێڤەگەرێ بلندێ شیعەیان ئایەتوڵاهـ عەلی سیستانی، دەربارێ شەرێ د ناڤبەرا ئیران و ئیسرائیلێ دە پەیامەک بەلاڤ کر و ئێریشێن ئیسرائیلێ شەرمەزار کرن. د پەیامێ دە هشیاری هات دایین کو ئەڤ رەوش دکارە ببە سەدەما “شەرەکی بێکۆنترۆل” و بانگا چارەسەریەکە ئاشتیانە هات کرن.
نڤیسگەها لێڤەگەرێ بلندێ شیعەیان ئایەتوڵاهـ عەلی سیستانی ئیرۆ 19ێ هەزیرانێ دەربارێ شەرێ د ناڤبەرا ئیران و ئیسرائیلێ دە د داخویانیەکێ هشیاری دا کو “پێنگاڤەکە ب ڤی رەنگی یا تاوانی”، بنپێکرنەکە ئەشکەرە یا یاسایێن ناڤنەتەوەیی و پیڤانێن ئۆلی و ئەخلاقییە.
هەروها هات گۆتن، ئەڤ رەوش دکارە ببە سەدەما ئەنجامێن گەلەک مەترسیدار ژ بۆ تەڤاهیا هەرێمێ و رێ ل بەر “شەرەکی تام ژ کۆنترۆلێ دەرکەتی و کائۆسەکە بەرفرەهـ” ڤەکە، کو دێ ئێشێن گەلان زێدەتر بکە و زرارێ بدە بەرژەوەندیێن هەموو ئالیان.
د پەیامێ دە وها هات گۆتن: “ئەم بانگ ل هەموو وەلاتێن جیهانێ و ب تایبەتی ل وەلاتێن ئیسلامی دکن کو هەموو هەولدانێن خوە ژ بۆ بداویکرنا ڤی شەری بکن و ل گۆری یاسایێن ناڤنەتەوەیی، ژ بۆ پرسگرێکا ئەتۆمی یا ئیرانێ چارەسەریەکە ئادلانە و ئاشتیانە پەیدا بکن.”
ئەڤ پەیاما سیستانی پشتی ئالۆزیێن ڤێ داویێ یێن د ناڤبەرا هەر دو وەلاتان دە تێ. بەربانگێ رۆژا ئینێ، 13ێ هەزیرانا 2025ان، ئارتێشا ئیسرائیلێ ب فرۆکەیێن شەر و درۆنان ئێریشی سازی و کارگەهێن ئەتۆمی و یێن چێکرنا مووشەکێن بالیستیکێن ئیرانێ کربوو. د هەمان ئێریشان دە هەژمارەک فەرماندارێن سەربازی و زانیارێن ئەتۆمی یێن ئیرانێ هاتبوون کوشتن.
ل هەمبەر ڤێ یەکێ، ئیرانێ ژی شەڤا ئینێ ب سەدان مووشەکێن بالیستیک ئێریش بربوو سەر باژارێن تەل ئاڤیڤ و حه‌یفایێ و د ئەنجامێ دە گەلەک ئاڤاهی و خانی هاتبوون هلوەشاندن.
