سەکرەتەریا گشتی یا ئەنجوومەنا نشتمانی یا کوردی ل سووریێ (ئەنەکەسە) د جڤینا خوە یا ئاسایی دە، ب کووراھی رەوشا سیاسی یا پشتی “کۆنفەرانسا یەکرێزیا ھەلوەستا کوردی” نرخاند. ئەنەکەسێ بال کشاند سەر ئاڤاکرنا “شاندا کوردی یا ھەڤبەش” و ھەڤدیتنێن ناڤنەتەوەیی و تەکەزی ل سەر پێویستیا ئاکتیفکرنا رۆلا خوە ل گۆری پێشھاتێن نوویێن ل سووریە و ھەرێمێ کر.
سەکرەتەریا گشتی یا ئەنجوومەنا نشتمانی یا کوردی ل سووریێ (ئەنەکەسێ) رۆژا ئینێ، 20ێ خزیرانا 2025ێ، جڤینا خوەیا ئاسایی ب ئامادەبوونا ھەموو ئەندامان ل دار خست و ئیرۆ 21ێ خزیرانێ ناڤەرۆکا جڤینێ د داخویانیەکێ دە ئاشکەرە کر.
نرخاندنا پێشھاتێن سیاسی و شاندا ھەڤبەشا کوردی
خالا یەکەما جڤینێ، نرخاندنا پێشھاتێن سیاسی یێن داوی بوو. سەرۆکێ ئەنەکەسێ بەحسا گەشەدانێن کو پشتی لدارخستنا “کۆنفەرانسا یەکرێزیا رێز و ھەلوەستا کوردی” چێبوونە، کر. د ڤێ چارچۆڤەیێ دە، بال ھات کشاندن سەر پێنگاڤا گرینگا ئاڤاکرنا شاندا کوردی یا ھەڤبەش و ھەڤدیتنێن کو ب ئالیێن ناڤنەتەوەیی یێن پێوەندیدار ب پرسگرێکا سووریەیێ رە ھاتنە کرن.
بەشدارێن جڤینێ ب یەکدەنگی تەکەزی ل سەر وێ یەکێ کرن، دڤێت ئەنەکەسە رۆلا خوە ل گۆری پێشھاتێن نھا یێن ل سووریە و ھەرێمێ ئەکتیڤ بکە و ب باندۆرتر بەشداری پرۆسەیا سیاسی ببە.
د جڤینێ دە ھەروھا ئەڤ مژار ھاتن گۆتووبێژکرن:
رەوشا ھەرێمی و ناڤنەتەوەیی: بەشداران باندۆرا نەرینی یا شەرێ د ناڤبەرا ئیسرایل و ئیرانێ دە ل سەر ھەرێمێ نرخاندن و بانگا دیالۆگا ئاشتیانە ژ بۆ چارەسەرکرنا پرسگرێکان کرن. وان داخواز کر کو جڤاکا ناڤنەتەوەیی بەرپرسیاریێن خوە ژ بۆ مسۆگەرکرنا ئەولەھی و ئارامیا ھەرێمی پێک بینە.
ھلبژارتن و ئاڤاکرنا سووریەیا نوو: جڤینێ ل سەر بریارا سەرۆکێ حکوومەتا ڤەگوھێز ئەھمەد ئەل-شەرع، یا ژ بۆ ئاڤاکرنا کۆمیتەیا بلند یا ھلبژارتنێن مەجلسا گەل سەکنی. ھات تەکەزکرن کو ژ بۆ چارەسەریەکا دادوەرانەیا دۆزا کوردی و دیارکرنا ناسنامەیا دەولەتا نوویا سووریەیێ، دڤێت لگەل تەڤگەرا سیاسی یا کورد دانوستاندن بێن کرن.
ئامادەکاریێن کۆنگرەیا 5ەمین: ئامادەکاریێن ژ بۆ لدارخستنا کۆنگرەیا پێنجەمین یا ئەنەکەسێ ھاتن گۆتوبێژکرن و ھات تەکەزکرن کو دڤێت د دەمەکێ نێزیک دە رێزکنامەیا ھلبژارتنێ و رێژەیێن نوونەراتیێ بێن دیارکرن دا کو بەشداریەکا بەرفرەھ مسۆگەر ببە.
د داویا جڤینێ دە، تەکەزی ل سەر گرینگیا بەردەوامکرنا کارێ ھەڤبەش د ناڤبەرا ھەموو پێکھاتەیێن گەلێ سووریەیێ دە ژ بۆ گھیشتنا دەولەتەکا دەمۆکراتیک ژ بۆ ھەموویان، ھات کرن.
