شێورمەندێ سەرۆکێ پارلەمەنتۆیا ئیرانێ ژ بۆ کارووبارێن ستراتەژیک مەھدی محەمەدی راگھاند، “ئێریشا ئامەریکایێ یا ل سەر سێ دەزگەھێن ئەتۆمی یێن ئیرانێ زرارەکا وەسا نەکریە کو ئەم نەکارن چارە بکن.” ئاماژە ژی دا، “تەھرانێ پێشوەخت ئامادەکاری ژ بۆ ڤێ سەناریۆیێ کربوون.”
شێورمەندێ سەرۆکێ پارلەمەنتۆیا ئیرانێ ژ بۆ کارووبارێن ستراتەژیک مەھدی محەمەدی ئیرۆ یەکشەمبێ، 22ێ خزیرانا 2025ێ، ل سەر پلاتفۆرما Xێ نڤیسیە، “ئەو ئێریشا ل سەر بنگەھا ئەتۆمی یا فۆردۆیێ یا نێزیکی پارێزگەھا قۆمێ تشتەکی عەجێب نەبوو. بەری دەمەکێ درێژ ئەو جھ ھاتبوو ڤالاکرن.”
شێورمەندێ سەرۆکێ پارلەمەنتۆیا ئیرانێ ژ بۆ کارووبارێن ستراتەژیک ھەروەسا گۆت، “ئەم ژ دو تشتان پشتراستین؛ یا یەکێ، زانست و چاند نایێن بۆمبەبارانکرن. یا دویێ ژی، قوماربازێن شەری ڤێ جارێ دێ شکێن.”
مەھدی محەمەدی تەکەز ژی کر، “ئەڤە چەند رۆژن کو تەھران پێشبینیا ڤێ ئۆپەراسیۆنێ دکە، ھەروەسا بەرگریێن ئاسمانی ژی د ئامادەباشیێ دە نە. وەسا ژی باندۆرا وێ ئێریشێ ھاتیە سینۆردارکرن، کو واشنتۆنێ گۆتبوو کو ئێریشا سبەھا ئیرۆ ب بالافرا B-2 کریە.”
ھەروەسا ئاژانسا ئیرنایێ یا نووچەیان یا فەرمی یا ئیرانێ ژی رۆن کربوو، “مادەیا تیشکدەر د جھێن ئەتۆمی یێن ئارمانجکری دە نەبوو، ئەڤ ژی وەکی بزاڤەکێ ژ بۆ پشتراستکرنا خەلکی کو چ تیرێژێن ئەتۆمی و کارەسات چێ نابن.”
ئەڤ داخویانی پشتی وێ یەکێ تێن کو سەرۆکێ ئامەریکایێ دۆنالد ترامپ دەستپێکرنا ئێریشێن ئاسمانی بۆ سەر دەزگەھێن ئەتۆمی یێن ئیرانێ ل فۆردۆ، نەتەنز و ئەسفەھانێ پشتراست کر.
