فایق زێدان گۆتیه ئەندامێن دادگەها فەدەرال: هوون بریارێ ل سەر مووچەیێ کوردستانێ بده‌ن، دێ سەرێ هه‌وە هێته ژێکرن
سیاسەتمەدارەکی ئیراقی ئاشکەرە کر كو ئەندامێن دادگەها فەدەرالا ئیراقێ ژ ئالیێ کەسێن کو ئیراقێ ژێر ب ژێر ئانكو (دەولەتا کوور) برێڤە دبن، ب کوشتنێ هاتینە تەهدیدکرن و فەرمان بۆ وان هاتیە کو بریارێ ل سەر پەیمانا خۆر عەبدولا و مژارا مووچەیێن مووچەگرێن کوردستانێ، نەدن.
سیاسەتمەدارێ ئیراقی و برایێ دامەزرینەرێ پارتیا فەزیلە یا ئیراقێ و برایێ پارێزگارێ بەرێ یێ بەسرایێ د. ئیسماعیل موصبح ئەلوالی د تۆمارەکا ڤیدیۆیی دا ئاشکەرا دکەت: سەرۆکێ ئەنجوومەنا دادوەرییا ئیراقێ د. فایق زێدان، گەفا کوشتنێ ل ئەندامێن دادگەها فەدەرال كرییه و گۆتیه وان کو ئەو سه‌رپشكن یان ده‌ست ژ كاری بكێشن یان دێ هێنه كوشتن.
ده‌ستنیشان كر، فایق زێدان گۆتیه وان، ئەگەر هوون بریارێ ل سەر ریككه‌فتنا خۆر عه‌بدوللا و هنارتنا مووچەیێ کوردستانێ بده‌ن، دێ سەرێ هه‌وه ب مرۆڤ و مالباتێن هه‌وه ڤە هێنه ژێکرن.
ب باوەرییا وی سیاسەتمەداری، نه‌هنارتنا مووچەی پلانەکە ژ بۆ زیان گەهاندنێ ب هەرێما کوردستانێ و دبێژیت: «فایق زێدان گۆتیە هوون بریارێ ل سه‌ر هنارتنا مووچەی نەده‌ن، وی دەمی دێ ببینن کا ئەم دێ چاوا فه‌وزایێ ل کوردستانێ چێكه‌ین».
سیاسەتمەدارێ ئیراقی گۆت ژی کو ئه‌ڤ فەرمانه ژ لایێ وەلاتەکی جیران ڤە هاتیە دان و چەندین کەس د ڤێ پیلانێ دا بەشدارن، ئانكو «مالکی، خه‌زعه‌لی و محەمەد حەلبووسی».
ئەڤ گۆتن د دەمەکی دا دهێن کو خایینکارێن زلامێن خه‌زعه‌لی کو خوە ل سلێمانیێ وەکی «کۆمیتەیا پاراستنا مامۆستە و کارمەندێن خوەپێشاندەر!» داینه نیاسین، دگەل په‌رله‌مانتارێن دن یێن خزمەتکارێن بەغدایێ، بانگ ل خه‌لكێ هەرێما کوردستانێ دکه‌ن کو خوەپێشاندانان بکه‌ن.
