شاندەیەکا پارتیا وەکھەڤی و دەمۆکراسیێیا گەلان (دەم پارتی) لگەل وەزیرێ داد یێ ترکیەیێ یلماز تونچ جڤیا و د ھەڤدیتنێ دە، رەوشا گرتیگەھان و پرسگرێکێن گرتیێن نەخوەش گۆتووبێژ کرن.
شاندەیا دەم پارتیێ کو ژ وەکیلێن کۆمێ گولستان کلچ کۆچییگیت و سزای تەمەلی و بەردەڤکێ کۆمیسیۆنا حقووق و مافێن مرۆڤان ئۆزتورک تورکدۆگان پێک دھات، ل وەزارەتا داد لگەل وەزیر یلماز تونچ ھەڤدیتنەک پێک ئانی کو دەمژمێرەکێ بەردەوام کر.
پشتی ھەڤدیتنێ، وەکیلێ کۆمێ سزای تەمەلی داخویانیەک دا چاپەمەنیێ و وھا گۆت: “ژ بۆ مە ھەڤدیتنەکا گەلەکی گرینگ بوو، ژ بەر کو ل گرتیگەھان ژ بەر پێکانینان پرسگرێکێن گەلەکی جدی ھەنە. مە ئەڤ پرسگرێک ئانین زمان و ھەم ل سەر ڤان پرسگرێکان نێرینێن خوە پارڤە کرن، ھەم ژی مە بەحسا لێگەرینا چارەسەریێ کر. ئەم ھێڤی دکن کو وەزارەت د دەمەک ھەری نێز دە خەباتێن پێویست بکە و ژ بۆ ڤان پرسگرێکان چارەسەریەکێ ببینە.”
تەمەلی د دەواما ئاخافتنا خوە دە تەکەزی ل سەر رەوشا گرتیێن نەخوەش کر و وھا پێ دە چوو: “مە تەکەزی ل سەر وێ یەکێ کر کو پێویستی ب چارەسەریەکا لەزگین ھەیە. وەزیر ژی دیار کر کو وی ھای ژ ڤان پرسگرێکان ھەیە و ل سەر دخەبتە. مە خوەست کو ئەڤ مژار بێیی دەرەنگخستن بکەڤە رۆژەڤێ. گرتیێن نەخوەش ب جانێ خوە رە تێدکۆشن. ھەر چەند پێشینیا مە گرتیێن نەخوەش بن ژی، مە بەحسا ھەموو پێکانینێن نەرینی یێن کو ل سەر گشت گرتیان باندۆرێ دکن، کر.”
