سەرۆکوەزیرێ ھەرێما کوردستانێ مەسروور بارزانی، پێشوازی ل راگھاندنا ئاگربەستێ یا ژ ئالیێ سەرۆکێ ئامەریکایێ دۆنالد ترامپ ڤە کر و تەکەز کر کو “خوە-راگرتن و دیالۆگ، تەکانە چارەسەرییە.”
سەرۆکوەزیر مەسروور بارزانی ئیرۆ 24ێ خزیرانێ پەیامەک ل سەر تۆرا جڤاکی یا “X” بەلاڤ کر و تێ دە پشتگریا خوە ژ بۆ ئاگربەستێ نیشان دا و گرینگیا ئارامیێ ژ بۆ ھەرێمێ ئانی زمان.
سەرۆکوەزیر مەسروور بارزانی د پەیاما خوە دە گۆت: “ئەز پێشوازیێ ل راگھاندنا ئاگربەستێ یا سەرۆک دۆنالد ترامپ دکم. خوە-راگرتن و دیالۆگ، تەکانە چارەسەرییە.”
ھەروھا دا زانین، دڤێت ل ھەرێمێ ئارامی و سەقامگیری ھەبە و وھا دۆماند: “پێویستیا ھەرێمێ ب ئارامیێ، رێزگرتنا ژ جیران و ھەڤپاران رە و بریارێن ل سەر بنگەھا شەھرەزایی و سەرکردایەتیەکە بەرپرسیار ھەیە.”
ئەڤ داخویانی پشتی وێ تێ، سەرۆکێ ئامەریکایێ دۆنلاد ترامپ ئیرۆ، د پارڤەکرنەکا خوە دە ل سەر تۆرا جڤاکی “تروس سۆسیال”، لھەڤکرنەک ژ بۆ “ئاگربەستەکا گشتی و تەمام” د ناڤبەرا ئیران و ئیسرایلێ دە راگھاندبوو. ل گۆری گۆتنا وی، ئەو لھەڤکرن دێ “داویێ ل شەری بینە”.
