ئیرانێ 3 گرتیێن کورد ب به‌هانه‌یا کو “سیخوریێ ژ سەرڤیسا ئیستخباراتێ یا ئیسرائیلێ مۆسادێ رە کرنە” سێداره دان.
تەلەڤیزیۆنا دەولەتا ئیرانێ داخویانیا نڤیسکی یا دەستهلاتا دادوەریێ یا دەربارێ مژارێ دە وەشاند.
ل گۆری نووچەیێ، جەزایێ ئیدریس عەلی، ئازاد شوجاعی و رەسوول ئەحمەد رەسوول کو ژ ئالیێ دادگەها بلندا ئیرانێ ڤە هاتبوو پەسەندکرن، ئیرۆ 25 هه‌زیرانا 2025ێ سەرێ سبێ ل گرتیگەها باژارێ ئورمیێ یێ رۆژهلاتێ كوردستانێ هات بجهئانین.
رێخستنا هەنگاوێ یا مافێن مرۆڤان راگهاند کو گرتی کورد بوونە و ل گرتیگەها ناڤەندی یا ئورمیێ ب دزی هاتنە سێداره دان.
هەنگاوێ دا زانین کو مافێ هەر سێ گرتیانێ هەڤدیتنا داوی یا ب مالباتێن خوە رە نەهاتیە دایین.
کەسێن کو هاتنە سێداره‌دان، ب ئیدیعایا «هەڤکاریکرنا ب دەولەتێن بیانی یێن دژمن رە» ب تاوانێن “تێکدان ل سەر روویێ ئەردێ” (افساد في-الارض) و “توهمه‌تێن شەر” و هەر وها ب ئانینا ئالاڤێن ته‌رۆریستی بۆ ناڤ ئیرانێ دهاتن تاوانبارکرن.
هاتبوو ئیدیعاکرن کو ئالاڤێن ناڤبۆری د كریاره‌كه ته‌رۆریستی دا ل دژی کەسەکی هاتنە بکارئانین.
هەنگاوێ راگهاند کو گرتیێن کورد ئیدریس عەلی و ئازاد شوجاعی باژارێ سەردەشتێ یێ رۆژهلاتێ نە و رەسوول ئەحمەد رەسوول ژی ژ باژارێ سلێمانیێ یێ باشوورێ کوردستانێ یە.
ل گۆری هەنگاوێ، ئیدریس عەلی، ئازاد شوجاعی و رەسوول ئەحمەد رەسوول د تیرمەها 2023یان دە ژ ئالیێ وەزارەتا ئیتلاعاتێ یا ئیرانێ ڤە هاتبوون دەستەسەرکرن.
هەر سێ کورد نێزیکی 8 مەهان ل ناڤەندەکا دەستەسەرکرنێ یا ل ئورمیێ هاتن راگرتن.
د ڤێ دەمێ دە رێ نەهات دایین کو گرتی مالباتێن خوە ببینن و ب پارێزەران رە بکەڤن تێکلیێ.
وەکی کو هەنگاوێ راگهاندیە، ئیدریس عەلی، ئازاد شوجاعی و رەسوول ئەحمەد رەسوول د دەما دەستەسەرکرنێ دە راستی ئیشکەنجەیێن گران یێن فیزیکی و دەروونی هاتن و ب زەخت و زۆرداریێ ژ بۆ ئعتیرافێ هاتن نەچارکرن.
د کانوونا پێشینا 2023یان دە ل دادگەها شۆرەشێ یا ئورمیێ هاتن دادگه‌هـ.
گرتیێن کورد د چریا پاشینا 2023یان دە جەزایێ سێداره‌دانێ ل وان هات برین و بریار د چریا پاشینا 2024ان دە ژ ئالیێ دەستهلاتا دادوەری یا ئیرانێ ڤە ب ئاوایەکی فەرمی هات پەسەندکرن.
