هەڤسەرۆکا دەم پارتیێ دەستنیشان کر، چارەسەریا پرسا کورد ژ بۆ ھەموو پرسگرێکان کلیلە و بانگ کر کو بریارێن دادگەھا مافێن مرۆڤان بهێن جیبجیکرن و گرتیێن سیاسی دەملدەست بهێن بەردان.
ھەڤسەرۆکا گشتی یا دەم پارتیێ تولای ھاتیمۆغولاری ئیرۆ 28ێ خزیرانێ ل ئەنقەرێ لگەل کارمەندێن کو ب بریارنامەیا د حوکمێ قانوونێ دە ژ کاری ھاتنە دوورخستن جڤیا و دەربارێ رۆژەڤا سیاسی و پێڤاژۆیا چارەسەریێ دە داخویانیێن گرینگ دان.
ھاتیمۆغولاری د جڤینێ دە بال کشاند سەر گرینگیا چارەسەرکرنا پرسا کورد و گۆت، “ل ترکیەیێ پرسا سەرەکی پرسا کوردە و ھەموو پرسگرێکێن کو دەردکەڤن، ئالیەکی وان گرێدایی ڤێ پرسێ نە.” دا زانین ژی، ژ بۆ چارەسەریێ دەرفەتەکا گرینگ ل پێشیا جڤاکێ ھەیە، لێ رەخنە ل دەستھلات و دەولەتێ گرت کو د ئاڤێتنا گاڤێن پێویست دە سست و ھێدی تەڤدگەرن.
ھاتیمۆغولاری دەربارێ پرسێن گەل یێن ل سەر پێڤاژۆیێ دە گۆت: “ھندەک کەس دپرسن ‘گەلۆ پێڤاژۆ خەتمیە؟’، ھندەک کەس دبێژن ‘ھێدی دمەشە’ و ھندەک کەس ژی دپرسن ‘گەلۆ ب راستی دێ ب ئاشتی و دەمۆکراتیکبوونێ ب داوی هێت؟’. ئەڤ پێڤاژۆ نھا ب رەنگەکی دمەشە، لێ دڤێت ھندەک گاڤێن لەزگین بهێن ئاڤێتن.”
ھەڤسەرۆکا دەم پارتیێ گاڤێن کو دڤێت دەملدەست بهێة ئاڤێتن وەھا رێز کرن: “پێویستی ب گاڤێن یاسایی و دادوەری ھەیە. گوھەرتنا یاسایا تێکۆشینا ل دژی تەرۆرێ و یاسایا ئینفازا زندانان پێویستیەکا بلەزە. دڤێت بریارێن دادگەھا مافێن مرۆڤان یا ئەورۆپایێ و دادگەھا دەستوورا بنگەھین بهێن جیبجیکرن و سەلاحەدین دەمیرتاش، فیگەن یوکسەکداغ، جان ئاتالای و عۆسمان کاڤالا دەملدەست بهێن ئازادکرن.”
ھاتیمۆغولاری تەکەز کر کو یەک ژ پێویستیێن ھەری لەزگین یێن ترکیەیێ، ئاڤاکرنا سیستەمەکا دادوەری یا دادوەرانەیە.
