ئەم د سالڤەگەرا سەدێ یا شەھیدبوونا وان دا شەھید شێخ سەعید و ھەڤالدۆزێن وی یێن شەھید ب رێزداری ب بیر تینن و رەژیما زۆردارا کەمالیست مەحکووم دکین و رادگھینین کو ئەم پەیرەوێن سەردەمی یێن ڤێ دۆزێ نە!
ب ھلکەفتا ڤێ رۆژێ پێویستی ب ئەشکەرەکرنا راستییا ھێلەکا دۆزا شێخ سەعید ژی ھەیە کو د رۆژێن وەھا دا گەنگەشەیێن ل دۆر ڤێ مژارێ دیسا گور و گەش دبن؛ ھەر تم ھندەک ئالییێن سکۆلار و ھندەک ئالییێن ئیسلامگر ھەول ددن کو راستییا دۆزا شێخ سەعید بەرەڤاژی بکن. ژخوە ئەڤە گەنگەشەیەکا دوور و درێژە کو ھەر و ھەر تێ دوبارەکرن گەلۆ دۆزا شێخ سەعید دینی بوو یان نەتەوەیی! ب سازکرنا ناکۆکییەکا سەختە یا د ناڤبەرا ئیسلام و کوردستانێ دا ھندەک ئالییێن ئیسلامگر ھەول ددن ڤێ دۆزێ ژ ھێلا وێ یا نەتەوەیی بشوون و ھندەک ئالییێن سکۆلار ژی ھەول ددن ژ ھێلا وێ یا ئیسلامی بشوون.
د ئیسلامێ دا خەباتا ژ بۆ رزگارکرنا ملەتەکی ژ بندەستییێ، ئەرکەکی دینییە ل سەر ھەر باوەرمەندەکی. واتە ل سەر ھەر باوەرمەندەکی فەرزە کو ھەر تم د ھەولدانا راکرنا زلمێ و دانینا دادپەروەریێ دا بە. ھەر وسا ئیرۆ ل ڤێ دەرێ ئیسلام؛ راکرنا زلما ل سەر ڤی ملەتی و دانینا دادپەروەریێیە کو ئەڤ یەک ژی ب ئازادییا ملەتێ کورد پێک دهێت. ل با شێخ سەعید ژی ئیسلام ئەڤە بوو. ئەڤ راستییە سەختەکارییا ھندەک ئالییێن ئیسلامگر ئەشکەرە دکە؛ واتە د شەخسێ شێخ سەعید دا نکارن ئیسلام و کوردستانێ ژ ھەڤ جودا بکن و ل دژی ھەڤ بدنە نیشاندان.
ھەلبەت ئیسلاما شێخ سەعید نە ل دژی پێکڤەژییانا جوداھییێن دینی و مەزھەبی و ئایدۆلۆژیکی بوو و ژخوە د ناڤا ھەڤالدۆزێن شێخ سەعید دا کەسایەتییێن سکۆلار ھەبوون؛ بۆ نموونە کاتبێ شێخ سەعید ئاتەیست بوو. ئەڤ راستی ژی سەختەکارییا ھندەک ئالییێن سکۆلار ئاشکەرا دکە؛ واتە د شەخسێ شێخ سەعید دا نکارن ئیسلام و پێکڤەژییانا جوداھییان ل دژی ھەڤ بدنە نیشاندان.
واتە ئیسلامیبوونا شێخ سەعید د دۆزا وی دا رزگاریخوازییا نەتەوەیی و ئازادیخوازییا دینی-ھزری ژ ھۆلێ راناکە، ھەر وسا ھەبوونا بیرووباوەرییێن جودا و ئارمانجا نەتەوەیی ژی ئیسلامیبوونا دۆزا شێخ سەعید ژ ھۆلێ راناکە. ئەڤ ناکۆکییێن سەختەیێن کو ئیرۆ ھندەک ئالییێن ئیسلامگر و ھندەک ئالییێن سکۆلار ھەر تم دوبارە دکن، ل با شێخ سەعید تنە بوون. ئەڤ ناکۆکییێن سەختە بەرھەمێن ئیسلاما کۆلۆنیالیست و سکۆلاریزما کۆلۆنیالیستن کو ئیرۆ د دل و مەژییێن گەلەک کوردان دا ژی رەنگ ڤەدانە.
