پارتیا وەلاتپارێزێن کوردستانێ (PWK) ب بۆنەیا سالڤەگەرا 100ێ یا دارڤەکرنا رێبەرێ تەڤگەرا نەتەوی یا کوردان یا 1925ێ، شێخ سەعید و ھەڤالێن وی، داخویانیەک بەلاڤ کر. PWK د داخویانیا خوە دە ھەم شەھید ب بیر ئانین، ھەم ژی بانگ ل دەولەتا ترک کر کو لێبۆرینێ بخوازە و جھێ گۆرێن وان ئەشکەرە بکە.
د داخویانیێ دە ھات گۆتن، 100 سال بەرێ د رۆژا 29ێ خزیرانا 1925ێ دە، شێخ سەعید و 46 ھەڤالێن وی ژ ئالیێ دەولەتا ترک ڤە ل تاخا دەرێ چیا یا ئامەدێ ھاتن دارڤەکرن. PWK دەستنیشان کر کو ئەڤ دارڤەکرن پشتی دادگەهکرنەکا “کۆرسان” و ب بنپێکرنا ھەموو پیڤانێن یاسایێن ناڤنەتەوەیی پێک ھاتیە.
PWK د داخویانیا خوە دە ب توندی داخواز کر، دڤێت دەولەتا ترک ژ بەر ڤان تاوانێن دیرۆکی لێبۆرینێ ژ گەلێ کوردستانێ بخوازە. ھەروھا بانگ کر کو جھێ تربێن شێخ سەعید و ھەڤالێن وی، کو ئەڤ سەد سالن ڤەشارتی نە، دەملدەست بهێن ئەشکەرەکرن.
تەکەز کر ژی، دۆزا کو شێخ سەعید و ھەڤالێن وی ژیانا خوە د رێ دە دان، ئیرۆ ژی ب خەبات و تێکۆشینا نەڤیێن وان ل ھەر چار پارچەیێن کوردستانێ ب ئاوایەکی وەلاتپەروەرانە بەردەوامە.
د داخویانیێ دە ھات گۆتن، ھەر دەستکەفتیەکێ سیاسی، نەتەوەیی و جۆگرافی ل ھەر پارچەیەکی کوردستانێ دێ روحا شەھیدان شاد بکە.
د داویا داخویانیێ دە، PWK د سالڤەگەرا 100ێ یا شەھادەتا وان دە، شێخ سەعید و 46 ھەڤالێن وی، ھەروھا پێشەنگێن دن یێن وەکی خالد بەگێ جبری، یوسوف زیا بەگ، عەلی رزا بەگ، در. فوئاد و ب دەھان ھەزار شەھیدێن دن یێن کو د سەرھلدانێ و پشتی وێ دە ھاتین شەھیدکرن، ب رێزداری ب بیر ئانین.
