تۆرا مەدیایی یا رووداوێ ئەشکەرە کر، بریارە د چەند رۆژێن بێ دە ھەژمارەک گەریلایێن پارتیا کارکەرێن کوردستانێ (پەکەکە) وەکی “نیەتپاکی” ژ بۆ سەرکەتنا پێڤاژۆیا چارەسەریێ یا ل ترکیەیێ، چەکێن خوە دەینن.
رووداوێ ژ دو چاڤکانیێن ئاگاھدار یێن ل ھەرێما کوردستانێ ئاگاھی وەرگرتنە و ل گۆری وان ھەر دو چاڤکانیان، مەراسیما چەکدانینێ دێ د دەستپێکا مەھا تیرمەھێ دە ل ھەرێما کوردستانێ بێ لدارخستن.
ل گۆری وان ئاگاھیێن کو کەتنە دەستێ رووداوێ، تێ چاڤەرێکرن کو “د چەند رۆژێن پێش دە رێبەرێ گرتی یێ پەکەکێ عەبدوللاھ ئۆجالان دەربارێ پێڤاژۆیا چارەسەریێ دە پەیامەکە نوو بەلاڤ بکە و پشتی وێ پێڤاژۆیا چەکدانینێ دەست پێ بکە.”
ھەر دو چاڤکانیێن رووداوێ دبێژن، د ناڤبەرا 3 هەتا 10ی تیرمەھێ دە، ھەژمارەکا گەریلایان کو ھەژمارا وان ھێژ ب تەمامی زەلال نەبوویە و دێ د ناڤبەرا 20 هەتا 30 کەسان دە بن، د مەراسیمەکێ دە ل سینۆرێ پارێزگەھا سلێمانیێ ب ئامادەبوونا مەدیایێ دێ چەکێن خوە دەینن.
دەربارێ چارەنڤیسا وان گەریلایێن کو چەکان داتینن دە، چاڤکانیان وھا گۆت:
“گەریلا دێ د مەراسیمێ دە چەکێن خوە دەینن و ڤەگەرن جھێن کو نھا لێ دژین، ئانگۆ ڤەناگەرن ناڤا باژارێن خوە.”
چاڤکانیێن رووداوێ ئاماژە ب وێ یەکێ دکن کو “ئەگەر گوھەرینێن سیاسی یێن بلەز و چاڤەرێنەکری روو نەدن، پلانا چەکدانینێ دێ د دەما خوە یا دیارکری دە وەک خوە برێڤە بچە.”
